Policia ka njoftuar se ka identifikuar autorin dhe e ka shpallur në kërkim pas ngjarjes në Pukë.
Mësohet se bëhet fjalë për një 26-vjeçar, i cili rreth orës 00:20, në dalje të qytetit të Pukës në aksin rrugor Pukë-Fushë-Arrëz ka qëlluar me armë në ajër.
Në njoftimin e Policisë, nuk specifikohet nëse ngjarja ka motive politike.
Por ka disa fakte të tjera interesante mbi këtë ngjarje dhe mbi autorin. I shpalluri në kërkim ka qëlluar me armë edhe tek Turizmi në Pukë që në fakt është pronë e kandidatit socialist.
Bëhet fjalë për djalin e ish-gjyqtarit Fran Prendi, i cili dha dorëheqje pasi filloi Vettingu, por që njëherësh është krahu i djathtë i kandidatit të koalicionit Berisha-Meta.
Më 28 tetor 2020, Këshilli i Lartë Gjyqësor, KLGJ, ka vendosur të deklarojë mbarimin e statusit të magjistratit për gjyqtarin e Gjykatës së Posaçme të Shkallës së Parë për Korrupsionin dhe Krimin e Organizuar, Fran Prendi, pas dorëheqjes së këtij të fundit.
“Arsyeja e dorëheqjes ka qenë angazhimi në një aktivitet privat”, shpjegoi asokohe koordinatori për të drejtën e informimit pranë KLGJ.
Në vendimin e KLGJ-së thuhet se gjyqtari Prendi e ka humbur të drejtën e ushtrimit të detyrës më datë 30 tetor.
Prendi e ka filluar karrierën në vitin 1995 në gjykatën e Pukës dhe ën vitin 2006 është transferuar në Gjykatën e Shkallës së Parë për Krime të Rënda.
o.j/dita
