Gjatë vizitës së tij zyrtare në Dublin, Kancelari gjerman Friedrich Merz dha dje një mesazh të qartë e pa ekuivok mbi zgjerimin e Bashkimit Evropian.
Merz veçoi vetëm Malin e Zi si të vetmin vend të rajonit që ka përmbushur pothuajse të gjitha kriteret e Kopenhagës dhe që duhet të anëtarësohet në BE brenda kësaj dekade. “Mali i Zi është gati të anëtarësohet. Ai i ka përmbushur pothuajse të gjitha kërkesat. BE duhet të mbajë fjalën dhe Mali i Zi nuk duhet të presë më”, u shpreh prerazi kreu i qeverisë gjermane, duke refuzuar mbajtjen peng të Podgoricës nga ecuria e vendeve të tjera kandidate.
Emri i Shqipërisë mungoi tërësisht.
Deklarata e Kancelarit gjerman krijon një përplasje të hapur me premtimin qendror politik të kryeministrit Edi Rama, i cili prej kohësh përsërit me bindje se Shqipëria do të jetë anëtare brenda vitit 2030.
Pse po tregon Gjermania këtë ftohtësi të prerë ndaj Tiranës? Në prapaskenat diplomatike, ky distancim nuk lindi në Dublin. Ka një krisje sistematike që po thellohet prej muajsh.
Gjermania ka qenë historikisht një nga kritikët më të ashpër e pa kompromis sa i përket mbrojtjes politike që Rama i siguroi zëvendëskryeministres Belinda Balluku. Mburoja politike ndaj saj ka rënë në sy të partnerëve gjermanë si një minim i drejtpërdrejtë i pavarësisë së drejtësisë së re.
Për më tepër, sinjalet e arritura nga burime informative flasin për dosje përgjimesh ku figuron vetë kryeministri Rama, materiale këto të sjella përmes kanaleve të partnerëve gjermanë në zyrat e SPAK-ut.
Kjo shpjegon edhe batutat thumbuese brenda vetë gjirit të së majtës. Pak kohë më parë, një prej figurave më ikonike të Partisë Socialiste e ironizoi situatën duke deklaruar publikisht se “Rama bën mirë të nisë të mësojë gjermanisht”.
Me shumë gjasa qëndrimi i Merz nga Dublini është një faturë e prerë për Tiranën.
Ajo përfshin edhe shpërfilljen, stigmatizimin e protestave të fundit dhe kalimin e vendimeve në mënyrë të njëanshme. Kjo qasje kundër parimeve bazë të BE-së për transparencën, gjithëpërfshirjen dhe mbrojtjen e mjedisit, e ka bindur Gjermaninë se prapa retorikës evropiane të Tiranës fshihet një qeverisje që funksionon me dyfytyrësinë dhe rregullat e faktit të kryer.
DITA
