Takimi i Kryeministrit Edi Rama në Berat, ku po diskutohet Reforma Territoriale, është shoqëruar me debate dhe tensione mes kreut të qeverisë dhe një grupi qytetarësh nga Poliçani.
Dëgjesa, e zhvilluar në ambientet e një hoteli në Berat, ka marrë një tjetër rrjedhë pas përplasjeve verbale gjatë diskutimit të shqetësimeve të banorëve. Në mesin e përfaqësuesve nga Poliçani ndodhej edhe aktorja Egla Ceno.
Takimi ka nisur me prezantimin e Ministrit të Pushtetit Vendor, Ervin Demo. Pas përfundimit të fjalës së tij, përfaqësuesit e Poliçanit kanë kërkuar të marrin fjalën për të paraqitur problematikat që lidhen me zonën e tyre.
Gjatë diskutimit, situata është tensionuar pas një reagimi të Kryeministrit Rama ndaj pjesëmarrësve. Përplasja verbale është vijuar edhe me kryebashkiakun e Poliçanit, Adriatik Zotkaj, si dhe me aktoren Egla Ceno.
Debati ka bërë që përfaqësia e ardhur nga Poliçani të largohet nga salla, duke ndërprerë pjesëmarrjen në dëgjesën për Reformën Territoriale në shenjë proteste ndaj zhvillimit të takimit.
j.l./ dita
