Diego Longo nuk do të jetë më trajner i Teutës. Klubi durrsak ka njoftuar përmes një postimi në faqen zyrtare se tekniku italian ka ndërprerë me konsensus bashkëpunimin, pas takimit që ka patur me presidentin Edmond Hasanbelliu.
Rezutaltet e dobta në këto javë të para sollën këtë ndryshim me ‘djemtë e detit” që morën vetëm 4 pikë në 5 ndeshje, duke fituar me Skënderbeun, barazuar me Tiranën. Ndërkohë, bregdetarët u mundën nga Partizani, Laçi dhe Vllaznia së fundmi.
Longo është trajneri i tretë që largohet në këto 5 javë kampionat, pasi më herët iku Stavri Nica nga Laçi dhe Rrahman Hallaçi nga Kukësi. Për Longon kjo ishte eksperienca e tretë në Shqipëri, pas aventurave me Kukësin dhe Flamurtarin.
Teuta njoftoi menjëherë se ka zgjedhur dhe trajnerin e ri pas ndërprerjes së bashkëpunimit me Diego Longon. SuperSport konfirmon se klubi durrsak ka vendosur të rikthejë në stol Edi Martinin, i cili fitoi titullin (2021), Kupën (2020) dhe Superkupën e Shqipërisë (2020, 2021) si trajneri i Teutës.
Kjo është hera e pestë që ish-sulmuesi i njohur shkodran merr drejtimin e bregdetarëve, po aq sa numri i trofeve të fituar si trajneri i skuadrës. Misioni kryesor është rikthimi i ekipit të rezultatet pozitive, pas startit të dobët nën drejtimin e Longos, i cili u shkarkua paraditen e sotme.
48-vjeçari drejtoi Teutën për herë të parë në periudhën (qershor 2010-maj 2011). Aventura e dytë që u shoqërua me fitimin e katër trofeve, zgjati nga dhjetori 2019-nëntor 2021, teksa u rikthye sërish në pankinën e Teutës më 16 dhjetor të vitit 2021, por drejtoi ekipin në katër ndeshje dhe u largua më 23 janar të këtij viti.
Herën e fundit Martini drejtoi Teutën sezonin e kaluar, teksa u ul në pankinë në nëntor të një viti më parë dhe qëndroi deri në qershor. Teuta vendosi të shkarkojë Diego Longon paraditen e të dielës, teksa fatale rezultoi humbja 2-0 në Shkodër…
