Fitojnë Tirana dhe Partizani, Egnatia siguron për herë të parë në histori pjesëmarrjen në Europë, feston edhe Teuta, ndërkohë që u mbyll pa fitues dueli Bylis-Kukësi. Bardheblutë e Orges Shehit triumfuan 1-3 në Laç, duke hedhur një hap drejt titullit kampion. Goli i Florent Hasanit dhe dygolëshi i Ardit Hilës u dhuruan kampionëve në fuqi një fitore të madhe në Kurbin.
Realizimi i Saliou Guindo në minutat shtesë, u shërbeu vetëm për statistikë bardhezinjve. Tirana vijon të kryesojë kampionatin shqiptar me 63 pikë, dy më shumë se Partizani ndjekës. “Demat” mposhtën 2-1 Vllazninë në kryeqytet. Arinaldo Rrapaj dhe Eljon Sota i dhuruan Partizanit avantazhin e dyfishtë në pjesën e parë. Shkodranët reaguan me Bekim Balajn, por nuk ia dolën të gjenin golin e barazimit.
Egnatia fitoi 3-2 përballë Erzenit (Dwamena dygolësh, Musta/Ademi, Kapllani), duke siguruar zyrtarisht vendin e tretë. Skuadra rrogozhinase do të luajë në Conference League gjatë verës. Teuta iu fal golit të shpejtë të Ledio Beqjes për të thyer 1-0 Kastriotin dhe për të parakaluar Laçin në renditje. Dramë dhe emocione të forta në Bylis-Kukësi (1-1). Vendasit kaluan në avantazh falë golit me penallti të Vangjel Zguros në “limite”, por me penallti shënuan edhe verilindorët me anë të kapitenit Gjelbrim Taipi (100+2′).
Skuadra ballshiote e mbylli ndeshjen me nëntë lojtarëve pas daljeve me të kuq të Joalisson dhe Zguros. Dy javë kanë mbetur për t’u luajtur deri në fundin e këtij sezoni në Abissnet Superiore.
