Si pasojë e përmbytjeve të shkaktuara nga shirat e rrëmbyeshëm në Turqi, të paktën 15 persona kanë humbur jetën, ndërsa mijëra të tjerë kanë mbetur pa pastrehë. Disa njerëz raportohen të zhdukur, teksa autoritetet po vijojnë punën në terren për gjetjen e tyre, si dhe për të pastruar rrugët të përmbytura dhe me baltë.
Reshjet intensive goditën dy rajonet që u shkatërruan edhe nga tërmeti katastrofik i muajit të kaluar, Adijaman dhe Shanlıurfa.
Akset kryesore u kthyen në lumenj, duke lënë të përmbytura shtëpi, spitale dhe biznese.
Rrjedhjet e fuqishme të ujit morën gjithashtu përpara makinat dhe çdo gjë tjetër përreth. Agjencia turke e Menaxhimit të Fatkeqësive bëri të ditur se në dispozicion u vendosën zhytës profesionistë, të cilët u përfshinë në përpjekjet e shpëtimit.
Shiu i dendur përmbyti gjithashtu njësinë e kujdesit intensiv në Spitalin e Trajnimit dhe Kërkimit, ndërsa pacientët janë transferuar në një spital tjetër. Shkollat kanë pezulluar mësimin, deri në përmirësimin e situatës.
Sipas parashikimeve, reshjet e shiut pritet të jenë me intensitet të lartë, të paktën deri në fundjavë, duke e rënduar edhe më shumë situatën në këto zona.
p.k\dita
