Mediat kanë publikuar dëshminë e Afërdita Ferracakut, e cila thotë se e ka njohur Milena Deraj përmes Elira Shytit.
Në bisedë e sipër, ajo i ka thënë se punon në departamentin e bonove të thesarit te Banka e Shqipërisë. Pasi i ka sugjeruar investimin, është kthyer disa herë të tjera duke insistuar për paratë.
Këtu thotë se i kanë nisur dyshimet se e mashtronte, pasi i thoshte se ka interesa aq të larta, sa shkonin në 100% të vlerës.
Afërdita thotë se u habit dhe iu kthye në mendje skema piramidale ku kishte interesa të larta dhe humbi shuma të ndryshme parash.
Pasi i ka bërë të qartë se s’ka mundësi për investime, Milena i ka bërë “propozim tjetër”: I ka thënë se bashkëshorti i saj punonte te Ministria e Brendshme dhe kishte njohje të rëndësishme që mund të nxirrte pasaporta shqiptare për shtetas jo të Shqipërisë.
Kjo gjë i interesonte dhe ua propozoi disa miqve në Kosovë. Por Milena kërkonte pagesë 10 mijë euro, shifër që të interesuarve u dukej e ekzagjeruar. Edhe për këtë, Ferracaku thotë se u tërhoq se s’kishte besim.
Gjatë takimeve dëgjonte vazhdimisht Milenën që pretendonte se njihte prokurorë e gjyqtarë dhe se kishte dijeni për çështjen e të afërmve të saj në Shkodër duke i thënë se njeh prokurorin Arjan Ndoj që mund t’ja zgjidhte.
Për këtë ka njoftuar Abedin Ferracakun, i cili erdhi në Tiranë të takonte Milenën dhe më pas u vunë kontakt bashkë.
Rreth 10 ditë para zgjedhjeve mësoi se Milena i kishte marrë shifrën 340 mijë euro për t’i ndihmuar por s’kishte bërë asnjë veprim për këtë çështje.
Pas interesimit që kishin, u kanë thënë se Milena ishte “duke investuar në një pallat me Tom Doshin”.
Duke qenë se kanë marrëdhënie familjare me këtë të fundit thonë se e kanë takuar në zyrat e tij. Doshi u ka thënë se Milena Derajn e njeh si emër por është mashtruese dhe të mos merren me të.
Po ashtu shprehet se ia kanë kërkuar paratë pa kërcënim duke i thënë se mund t’i mbajë 50 mijë euro.
Sipas Afërditës, i kishin thënë se paratë i duheshin se ishin në hall prej proceseve gjyqësore. Në dëshminë e saj mohon pretendimet se e kanë kërcënuar apo e kanë marrë peng.
Sipas saj, Milena dy ditë para zgjedhjeve është takuar me Abedin Ferracakun, i cili i tha se komunikoi në telefon me Tom Doshin. Më pas, Abedini, Afërdita dhe Milena u nisën për në Shkodër.
Sipas Milenës, u ndalën te një ndërtesë në Kiras ose Zus ku nuk kishte persona të tjerë edhe erdhi vëllai i Abedinit, i cili ishte i armatosur.
Ajo thotë se e futën në një dhomë ku i thanë se aty ishte ulur edhe Arjan Ndoj ndërsa thotë se qëndroi rreth 2 orë e 30 minuta dhe u kërcënua me armë se do vritej nëse përveç shumës 340 mijë euro që u kishte marrë, nuk do u jepte edhe 200 mijë euro të tjera.
Gjithashtu pretendon se e kanë detyruar të bëjë video ku do thoshte:
“Unë e quajtura Milena Deraj për çështjen e zotit Abedin Ferracaku kam marrë shumën prej 540 mijë euro për dosjen Ferracaku me prokurore Znj. Hamzaj”.
Pas disa orësh e lanë të lirë dhe u kthye për në Tiranë së bashku me Afërditën. Ajo tregon se tentoi të kontaktonte me Arjan Ndoj por e kishte të pamundur.
Për shifrën 340 mijë euro thotë se i ka kthyer vetëm 140 mijë ndërsa shumën tjetër prej 200 mijë euro i kishte investuar në fshatin Salari, Tepeleni për një shtëpi guri.
Ajo pretendon se familja Ferracaku i ka kërcënuar edhe të afërmit.
Sipas saj, më 22 maj e ka telefonuar Abedin Ferracaku përmes një numri të huaj duke thënë “Të erdhi dita të pres në Shkodër”.
Ajo pretendon se 6 ditë para zgjedhjeve, Tom Doshi e ka telefonuar për ta pyetur rreth historisë me vëllezërit Ferracaku. Sipas Milena Derajt, është takuar me Tom Doshin në zyrën e tij ku i ka thënë se do ja kthente paratë.
o.j. / dita
