Trupat e dy turistëve janë gjetur të pajetë në Qafë-Valbonë ditën e djeshme. Dyshohet se viktimat që janë gra, janë rrëzuar në një zonë të thepisur dhe kanë përfunduar në greminë. Bëhet me dije se pas kërkimeve disaorëshe në terren të vështirë, efektivët kanë bërë të mundur që në vendin e quajtur “Qafë Valbonë”, të gjenin trupat e pajetë të dy turisteve, shtetases belge me inicialet B. M., dhe shtetases franceze me inicialet J. B. Për shkak të terrenit të ashpër, si edhe kushteve atmosferike, as helikopteri nuk ka mundur të ulet në vendin ku janë gjetur trupat e pajetë.
Për të mundësuar nxjerrjen e trupave, shërbimet e Policisë vendore dhe të asaj Kufitare, si dhe skuadra alpine, po bashkëpunojnë me Emergjencat Civile dhe me Ministrinë e Mbrojtjes. “Grupi hetimor i Drejtorisë Vendore të Policisë Kukës ndodhet në vendngjarje dhe në drejtimin e Prokurorisë, po punon për zbardhjen e rrethanave të kësaj ngjarjeje dhe për përcaktimin e shkakut të humbjes së jetës së dy turisteve”, thuhet në njoftim. Ngjarja cilësohet si aksidentale, teksa viktimat nuk kanë pasur me vete staf guide dhe specialistë sigurie.