Pas aksidentit tragjik të ndodhur një ditë më parë në Durrës, ku humbën jetën dy të mitur dhe u plagos një tjetër, Policia e Shtetit ka marrë masa të menjëhershme ndaj drejtuesve lokalë.
Drejtori i Përgjithshëm i Policisë së Shtetit, Drejtues Madhor Skënder Hita, ka vendosur pezullimin nga detyra për performancë të dobët të disa zyrtarëve kryesorë të Drejtorisë Vendore të Policisë Durrës. Konkretisht janë pezulluar:
- Drejtori i DVP Durrës, Drejtues Afrim Tafa
- Zëvendësdrejtori për Rendin dhe Sigurinë Publike, Kryekomisar Zija Sulaj
- Shefi i Sektorit të Policisë Rrugore, Kryekomisar Kreshnik Skëndo
Menjëherë pas ngjarjes së rëndë, është ngritur një grup ekspertësh nga Drejtoria e Policisë Rrugore për të analizuar në terren shkaqet dhe rrethanat e aksidentit.
Paralelisht, Drejtoria e Standardeve Profesionale ka nisur një hetim disiplinor për të përcaktuar nëse ka përgjegjësi nga ana e punonjësve të policisë lidhur me këtë rast të rëndë.
Ngjarja ka tronditur opinionin publik dhe ka rikthyer në vëmendje çështjen e sigurisë rrugore në vend.
j.l./ dita
