Trazirat për ligjin ushtarak, arrestohet ish-ministri i mbrojtjes së Koresë së Jugut

Ish-ministri i Mbrojtjes i Koresë së Jugut, Kim Jong-hyun u arrestua sot me urdhër të prokurorit për rolin e tij në përpjekjen e dështuar të Presidentit Yoon Seok-gil për të vendosur ligjin ushtarak në vend. Lajmin e njoftoi agjencia e lajmeve Yonhap. Kim, i cili dha dorëheqjen të mërkurën, thuhet se ka luajtur një rol qendror në vendosjen e ligjit ushtarak. Sipas një zyrtari të lartë ushtarak dhe ligjvënësve të opozitës që paraqitën një mocion për shkarkimin e kreut të shtetit, Kim e kishte këshilluar presidentin Yun të shpallte gjendjen ushtarake në Korenë e Jugut.

Mocioni për shkarkimin e presidentit Yun u votua në parlament të shtunën, por kreu i partisë në pushtet i bëri thirrje atij të jepte dorëheqjen. Kim u paraqit vullnetarisht para një prokurori të Seulit dhe më pas u arrestua dhe u ndalua të largohej nga vendi në pritje të një hetimi. Presidenti Yun Seok-gil, ish-ministri i Mbrojtjes Kim Jong-hyun dhe shefi i Shtabit të Mbrojtjes Kombëtare Park Ahn-soo janë akuzuar nga opozita për tradhti dhe autoritetet e Koresë së Jugut që po hetojnë rastin.

Yun tronditi publikun kur shpalli ligjin ushtarak të martën mbrëma, duke pretenduar se donte të eliminonte “forcat anti-shtetërore, miqësore ndaj Koresë së Veriut” në vendin e tij. Presidenti nuk përmendi ndonjë kërcënim specifik nga Koreja e Veriut, e cila është një fuqi bërthamore, por përkundrazi u fokusua te rivalët e tij politikë të brendshëm.

Megjithatë, shumica e parlamentit të Koresë së Jugut e hodhi poshtë dekretin, duke e detyruar presidentin të heqë ligjin ushtarak vetëm gjashtë orë më vonë. Vendimi i papritur i Yun për të shpallur ligjin ushtarak e ka zhytur Korenë e Jugut – ekonominë e katërt më të madhe të Azisë dhe një aleat kryesor ushtarak të SHBA-së – në krizën e saj më të keqe politike në dekada dhe është një “faqe e zezë” në historinë e vendit.

j.l./ dita