Nga Migena Aleksi
Pas muajsh të tërë fushate intensive dhe miliarda dollarësh të shpenzuar, Uashingtoni dhe e gjithë bota ndodhen përpara njërës prej netëve më përcaktuese politike. Dita e votimit për zgjedhjet e mesmandatit (midterms) ka mbërritur, dhe me të vjen edhe pyetja kryesore: si do të ndryshojë balanca e pushtetit në Kongresin Amerikan?
Analisti i BBC për Amerikën e Veriut, Anthony Zurcher, zbërthen tre skenarët kryesorë se si mund të rrjedhin ngjarjet pas numërimit të votave.
1. “Vala e Kuqe” – Kontroll i plotë nga Republikanët
Në skenarin e parë, Republikanët arrijnë një fitore bindëse duke marrë kontrollin e të dyja dhomave të Kongresit – si Dhomën e Përfaqësuesve, ashtu edhe Senatin.
Kjo do të nënkuptonte një bllokim të plotë të agjendës legjislative të Shtëpisë së Bardhë për dy vitet e ardhshme. Me një shumicë republikane, Presidenti do të përballej jo vetëm me pengimin e reformave kryesore, por edhe me një seri hetimesh kongresionale mbi administratën e tij, mbyllje të mundshme të qeverisë gjatë debateve për buxhetin dhe kontroll të rreptë mbi emërimet zyrtare.
2. Pushtet i ndarë – Kongres i përçarë
Skenari i dytë – dhe një nga më të diskutuarit – është ndarja e kontrollit të Kongresit. Në këtë rast, Republikanët mund të marrin Dhomën e Përfaqësuesve, ndërsa Demokratët arrijnë të ruajnë shumicën minimale në Senat (ose e kundërta).
Kjo strukturë sjell një ngërç të përhershëm institucional (gridlock). Ndërsa Dhoma e Përfaqësuesve mund të bllokojë faturat financiare dhe nismat e reja ligjore, një Senat në duart e partisë në pushtet do t’i mundësonte administratës të vazhdojë konfirmimin e gjyqtarëve federalë dhe zyrtarëve të lartë ekzekutivë.
3. Qëndrueshmëria e Demokratëve – Surpriza e shumicës
Skenari i tretë parashikon që Demokratët të sfidojnë tendencat historike të zgjedhjeve të mesmandatit dhe të ruajnë kontrollin mbi të dyja dhomat.
Nëse kjo ndodh, administrata do të ketë një mandat të qartë për të çuar përpara me shpejtësi projektet e saj legjislative, reformat ekonomike dhe sociale, si dhe për të konsoliduar politikat e saj të jashtme pa ndërhyrjen bllokuese të opozitës.
Çfarë pritet tani?
Me mbylljen e qendrave të votimit në të gjithë brezat orarë të SHBA-së, vëmendja është përqendruar në garat kryesore “swingtate” (shtetet përcaktuese).
Rezultatet e para pritet të japin sinjalet e para nëse Uashingtoni po shkon drejt një ndryshimi dramatik të kursit politik apo drejt një ekuilibri të brishtë pushteti.
DITA
