Presidenti i Shteteve të Bashkura të Amerikës, Donald Trump, ka nënshkruar projektligjin e tij historik për politikat, vetëm një ditë pasi u miratua me një diferencë të ngushtë nga Kongresi.
Ngjarja e nënshkrimit, zbaton pjesë kyçe të axhendës së Trump, duke përfshirë uljen e taksave, rritjen e shpenzimeve për mbrojtjen dhe goditjen ndaj imigracionit.
Trump u tha mbështetësve të tij se kjo do të nxisë rritjen ekonomike, por tani ai duhet të bindë amerikanët skeptikë, pasi sondazhet tregojnë se shumë prej tyre nuk e miratojnë projektligjin, raporton BBC.
Disa anëtarë të partisë së tij republikane, ishin kundër për shkak të ndikimit në rritjen e borxhit të SHBA-ve dhe demokratët paralajmëruan se projektligji do të shpërblente të pasurit dhe do të ndëshkonte të varfërit.
Projektligji prej 870 faqesh përfshin:
-zgjatjen e uljeve të taksave të vitit 2017 të mandatit të parë të Trump
-shkurtime të mëdha në shpenzimet e Medicaid, skema e kujdesit shëndetësor e ofruar nga shteti për ata me të ardhura të ulëta dhe personat me aftësi të kufizuara
-lehtësime të reja tatimore për të ardhurat me bakshish, orët shtesë dhe Sigurimet Shoqërore
-një rritje të buxhetit prej 150 miliardë dollarësh për mbrojtjen
-një ulje të kredive tatimore për energjinë e pastër të epokës së Bidenit
-100 miliardë dollarë për Imigracionin dhe Doganat (ICE)
Në një fjalim nga ballkoni i Shtëpisë së Bardhë përballë South Lawn, Trump falënderoi ligjvënësit republikanë që ndihmuan në sjelljen e projektligjit në tavolinën e tij. Ai vlerësoi uljet e taksave në projektligj, duke lënë mënjanë kritikat për ndikimin në programet sociale si ndihma ushqimore dhe Medicaid.
“Shkurtimi më i madh i shpenzimeve, megjithatë, as nuk do ta vini re”, tha ai për projektligjin. “Njerëzit janë të lumtur.”
Për më tepër, Trump vlerësoi burimet shtesë që po i jepen zbatimit të ligjit kufitar dhe të imigracionit dhe heqjen e taksave mbi bakshishet, orët shtesë dhe sigurimet shoqërore për të moshuarit, të cilat ai thotë se do të përmbushen me projektligj.
Udhëheqësi i pakicës në Dhomën e Përfaqësuesve, Hakeem Jeffries, e quajti projektligjin një “sulm të jashtëzakonshëm ndaj kujdesit shëndetësor të popullit amerikan” dhe citoi dëshmi nga individë të shqetësuar për ndikimin e tij.
Sipas Qendrës së Politikave Tatimore, ndryshimet tatimore në projektligj do t’u sillnin më shumë dobi amerikanëve më të pasur sesa atyre me të ardhura më të ulëta. Analiza e saj zbuloi se rreth 60% e përfitimeve do t’u shkonin atyre që fitojnë mbi 217,000 dollarë (158,000 £).
