Presidenti i SHBA-së, Donald Trump, ka sulmuar ashpër Elon Muskun, duke e akuzuar se ka përfituar më shumë subvencione shtetërore se çdo individ tjetër në histori për aktivitetet e tij me makinat elektrike.
Kjo deklaratë vjen pasi Musk ka kritikuar publikisht projektligjin e ri të buxhetit që po diskutohet në Senatin amerikan, i njohur si “Big Beautiful Bill”.
Presidenti Trump ka sugjeruar që Departamenti për Efiçencën Energjetike të hetojë subvencionet që kompanitë e Elon Musk, përfshirë Tesla dhe SpaceX, kanë përfituar ndër vite. SpaceX aktualisht ka kontrata federale në vlerë rreth 22 miliardë dollarë, ndërsa Starlink po zgjerohet me ritme të shpejta në të gjithë globin.
Në reagim, Musk shkroi në platformën e tij sociale X: “Po them fjalë për fjalë: priteni gjithçka. Menjëherë.”
Tensionet mes dy miliarderëve janë përshkallëzuar që në fillim të qershorit, kur nisën përplasjet publike për projektligjin e propozuar nga administrata Trump, i cili sipas analistëve të pavarur do të shtonte rreth 3,000 miliardë dollarë në borxhin publik amerikan.
Përplasjet me Trump kanë pasur ndikim të menjëhershëm edhe në tregjet financiare. Më 5 qershor, aksionet e Tesla-s ranë me 150 miliardë dollarë në vlerë tregu, rënia më e madhe ditore në historinë e kompanisë. Sot, aksionet e Tesla-s në bursën e Frankfurtit ranë me 5%.
Pas javësh heshtjeje, Musk e quajti paketën që po votohet në Senat si “tërësisht e çmendur dhe shkatërruese”, duke akuzuar ligjvënësit që e mbështetën për hipokrizi.
“Ata që premtojnë shkurtime në shpenzime dhe më pas votojnë për këtë ligj, duhet të ndihen të turpëruar. Dhe do të humbasin zgjedhjet paraprake vitin tjetër, edhe nëse kjo është gjëja e fundit që bëj në këtë planet,” shkroi ai.
Musk ka ripërsëritur thirrjen për krijimin e një partie të re politike, duke ironizuar se vendi po qeveriset nga “Partia Porky Pig”, në referencë ndaj shpenzimeve të tepruara buxhetore.
Miliarderi, i cili në të kaluarën ka kontribuar me rreth 300 milionë dollarë për fushatën e Trump dhe ka mbështetur iniciativën e tij për uljen e shpenzimeve DOGE, tashmë është kthyer në një kritik të hapur të administratës aktuale.
Nuk është ende e qartë sa ndikim do të kenë deklaratat e Muskut në Kongres, por brenda radhëve republikane është rritur shqetësimi se kjo përplasje publike mund të dëmtojë shanset për të ruajtur shumicën në zgjedhjet e mesmandatit në vitin 2026.
i.b./dita
