Fakti që lufta në Ukrainë do të ishte një nga temat më të nxehta në krye të axhendës së administratës së re amerikane ishte një sekret i hapur. Që në ditën e parë të rizgjedhjes së Donald Trump në presidencën amerikane, filloi skenari i ndryshimit të qëndrimit të SHBA-së në lidhje me mbështetjen për Kievin, që nga momenti kur republikanët braktisën Bidenin për dhënien e fondeve të tepërta për ndihmën ushtarake.
Pak ditë pas zgjedhjes së Trump, sipas mediave ndërkombëtare, ka ndodhur biseda me Putinin, ku presidenti i zgjedhur i SHBA-ve dyshohet se i ka kërkuar presidentit rus që të mos vazhdojë me përshkallëzimin e mëtejshëm në territoret ukrainase.
Në të njëjtën kohë, sipas burimeve të Washington Post, Trump e informoi Putinin për praninë ushtarake amerikane në Evropë. Ata konsideruan gjithashtu mundësinë e një bisede të re në një periudhë të shkurtër kohore, me sy në një armëpushim.
Të premten, megjithatë, u bë e ditur se Kremlini tha se Putin është gati të bisedojë me Trump për Ukrainën, por kjo nuk do të thotë se pala ruse synonte të tërhiqte pretendimet e saj. Biden do të diskutojë prioritetet kryesore të politikës së brendshme dhe të jashtme amerikane me presidentin e sapozgjedhur kur të dy të takohen të mërkurën në Shtëpinë e Bardhë, tha sot këshilltari amerikan për sigurinë kombëtare, Jake Sullivan. Kjo do të thotë se çështja e Ukrainës do të jetë në krye të agjendës së bisedimeve dypalëshe.
Në të njëjtën kohë, se pak ditë më parë Volodymyr Zelenskyy deklaroi se beson se Trump dëshiron një fund të shpejtë të luftës së Rusisë në Ukrainë, por kjo nuk do të thotë se do të ndodhë domosdoshmërisht. Presidenti ukrainas tha se ai nuk di asnjë detaj apo një plan për një fund të shkurtër të luftës dhe nuk ka diskutuar asnjë propozim me Trump.
Duke folur me gazetarët në samitin e Komunitetit Politik Evropian në Budapest, Zelenskyy tha gjithashtu se diskutimi i një armëpushimi pa rënë dakord më parë për garancitë e sigurisë për Ukrainën është “shumë i rrezikshëm”.
“Një armëpushim kur nuk ka garanci sigurie… është një përgatitje për vazhdimin e okupimit,” tha ai.
Disa orë pasi një këshilltar i Trump tha se administrata e re amerikane do të fokusohet në arritjen e paqes në Ukrainë dhe të mos lejojë vendin të rimarrë territorin e mbajtur nga Rusia, shefi i politikës së jashtme të BE-së për politikën dhe sigurinë, Josep Borrell e siguroi Kievin për mbështetjen e pandarë të Brukselit.
Në veçanti, Brian Lanza, një këshilltar strategjik i partisë republikane, i tha BBC-së se administrata Trump do t’i kërkojë presidentit ukrainas propozimin e tij mbi një “vizion realist për paqen”.
“Dhe nëse presidenti Zelensky vjen në tryezë dhe thotë, mirë, ne mund të kemi paqe vetëm nëse kemi Krimenë, kjo na tregon se ai nuk është serioz”, nënvizoi ai.
“Krimea është e humbur”, shtoi këshilltari i Trump.
Rusia aneksoi gadishullin e Krimesë në vitin 2014. Tetë vjet më vonë, ajo filloi një pushtim të plotë të Ukrainës dhe ka pushtuar territorin në lindje të vendit. Presidenti i zgjedhur i SHBA-së e ka vendosur si prioritet të tij përfundimin e luftës dhe ndalimin e asaj që ai e përshkruan si shterim të burimeve amerikane në formën e ndihmës ushtarake për Ukrainën. Megjithatë, ai ende nuk ka treguar se si planifikon ta bëjë këtë.
Fitorja e Donald Trump po shkakton shqetësim në Ukrainë dhe Evropë, të cilat kanë frikë se do t’i japë fund mbështetjes jetike ushtarake dhe financiare të Uashingtonit për Kievin në luftën e tij kundër cënimit rus.
j.l./ dita
