“U them fuck you”, Rama iu përgjigjet akuzave për korrupsion në Financial Times: Nuk jam unë “Kumbari”

Kryeministri Edi Rama ka dhënë një intervistë për The Financial Times ku dhe ka komentuar protestat që po zhvillohen prej më shumë se tre javësh në Shqipëri.

Artikulli i plotë:

Kryeministri Edi Rama ka mohuar të jetë “Kumbari” i Shqipërisë pas javësh protestash kundër korrupsionit, të nxitura nga zhvillimi i një resorti luksoz i lidhur me dhëndrin e Donald Trump.

I pagëzuari si “Revolucioni i Flamingove” u shkaktua nga zemërimi publik për projektin prej 4 miliardë dollarësh të planifikuar nga Jared Kushner dhe Ivanka Trump në një ishull dhe pranë një rezervati natyror të njohur për flamingot.

Protestuesit kanë kërkuar dorëheqjen e Ramës dhe ndjekjen e tij penale për atë që ata e konsiderojnë korrupsion sistemik.

“Njerëzit thonë se unë jam udhëheqësi i gjithë kësaj. Unë u them: ‘fuck you’. Kaq e thjeshtë,” tha ai. “Nuk më takon mua të provoj se nuk jam Kumbari, u takon atyre të provojnë se jam Kumbari.”

Prokurorët shqiptarë kanë lëshuar urdhër-arreste për një duzinë biznesmenësh për trafik droge dhe pastrim parash, përfshirë një prej tyre që zotëron tokën në vendin ku do të zhvillohet projekti i Kushner dhe bashkëshortes së tij, Ivanka Trump.

Një zëdhënës i Kushner dhe partnerëve të tij të tjerë në Shqipëri nuk iu përgjigj kërkesave për koment lidhur me këtë.

Kurse Rama këmbëngul se investimet e Kushner janë të rregullta.

“Të thuash se ekonomia shqiptare bazohet te pastrimi i parave, kjo është e tmerrshme,” i tha Rama Financial Times në zyrën e tij, me pamje nga bulevardi ku dhjetëra mijëra njerëz kanë protestuar çdo mbrëmje për më shumë se tre javë. “Mendoni se nuk ka pastrim parash në Londër?”

Dyshohet se miliarda euro janë kanalizuar drejt projekteve të mëdha të ndërtimit përgjatë bregdetit Adriatik dhe në kryeqytetin shqiptar.

Rama përsëriti pretendimet se protestat janë nxitur nga kundërshtarët e presidentit amerikan, përfshirë Iranin.

“Ka shumë interes për ta vrarë këtë projekt… për shkak të Trump,” tha ai. “Po të mos ishte Jared Kushner… askujt nuk do t’i interesonin flamingot, Shqipëria apo asgjë tjetër. Është e gjithë urrejtja kundër Trump që krijon gjithë këtë vëmendje dhe shqyrtim.”

Ai është i bindur se planet për zhvillimin e bregdetit do të ecin përpara pavarësisht protestave.