UEFA ka kërkuar nga një gjykatë federale në Nju Jork që të refuzojë përpjekjen e dy kompanive amerikane të FIFA-s për t’u përfshirë në betejën ligjore për sigurimin e dokumenteve dhe dëshmive që mund të përdoren në një procedurë të mundshme penale ndaj presidentit të FIFA-s, Gianni Infantino.
Në një parashtresë të dorëzuar në gjykatë, UEFA ka kundërshtuar përfshirjen e FIFA (Americas) Inc. dhe FWC2026 US Inc., duke argumentuar se këto kompani po përpiqen të veprojnë në emër të FIFA-s dhe Infantinos, edhe pse vetë FIFA dhe presidenti i saj nuk kanë kërkuar të bëhen pjesë e çështjes.
UEFA kërkon dokumente dhe dëshmi nga kompania amerikane Thrive Capital Management dhe themeluesi i saj, Joshua Kushner, në lidhje me projektin FIFA Forward Enterprise. Ky projekt, i braktisur nga Infantino më 1 gusht pas reagimeve të ashpra, parashikonte shitjen e një pjese të përhershme të të drejtave komerciale dhe operative të Kupës së Botës dhe garave të tjera të FIFA-s te investitorë privatë.
Organizata evropiane e futbollit ka bërë të ditur se po shqyrton paraqitjen e një ankese penale në Zvicër ndaj Infantinos dhe zyrtarëve të tjerë të FIFA-s, duke pretenduar keqmenaxhim të mundshëm kriminal lidhur me këtë projekt. UEFA dyshon se dokumentet dhe dëshmitë që kërkon në SHBA mund të ndihmojnë në sqarimin se si u konceptua, strukturua, vlerësua dhe miratua marrëveshja e propozuar.
FIFA e ka cilësuar më herët veprimin e UEFA-s si një “fushatë shpifjesh” dhe e ka akuzuar organizatën evropiane se po zhvillon një përpjekje për të dëmtuar FIFA-n dhe udhëheqjen e saj. Infantino ka mohuar se ka bërë ndonjë shkelje.
Ndërkohë, gjykata amerikane ende nuk ka marrë vendim as për kërkesën e UEFA-s për sigurimin e provave dhe as për kërkesën e kompanive të FIFA-s për t’u përfshirë në procedurë.
Përplasja vjen në një moment gjithnjë e më të vështirë për Infantinon. Një ditë më parë, Federata Franceze e Futbollit tërhoqi mbështetjen për rizgjedhjen e tij në krye të FIFA-s, duke iu bashkuar një grupi federatash evropiane që kanë shprehur shqetësime për qeverisjen dhe transparencën e organizatës.
j.l./ dita
