Persona të armatosur kanë hyrë në studion e një kanali televiziv publik në Ekuador, teksa transmetonte drejtpërdrejt një emision dhe kanë kërcënuar me armë moderatorin.
Personat me fytyra të mbuluara dhe të armatosur deri në dhëmbë, hynë në ambientet e rrjetit të televizionit TC në qytetin port të Guayaquil duke thirrur se kishin “bomba”. Po ashtu në selinë e televizionit janë dëgjuar të shtëna me armë. Nuk dihet nëse ka persona të lënduar pasi ngjarja ka ndodhur vetëm pak minuta më parë.
Ekuadori është tronditur nga një seri sulmesh duke përfshirë shpërthime dhe rrëmbim të disa oficerëve të policisë pasi qeveria vendosi shpalljen e gjendjes së jashtëzakonshme pas arratisjes të një lideri të fuqishëm bande nga burgu.
Policia njoftoi se katër oficerë u rrëmbyen të hënën në mbrëmje dhe janë aktualisht të zhdukur, një në kryeqytet, Quito dhe tre në qytetin Quevedo. Agjentët arrestuan dy persona për posedim eksplozivi dhe si të dyshuar në të paktën një nga sulmet në shtetin e Amerikës së Jugut.
Qeveria nuk ka thënë se sa sulme janë regjistruar gjithsej, por mediat lokale raportuan disa, duke përfshirë disa në qytetet veriore, ku u dogjën automjete, dhe të tjera në Quito, duke përfshirë një shpërthim pranë shtëpisë së presidentit të Drejtësisë Kombëtare.
Reagimet erdhën pasi Ekuadori shpalli gjendjen e jashtëzakonshme dhe qeveria deklaroi se vendi është në luftë me kartelet e drogës, kryesisht me prejardhje ballkanike, veçanërisht shqiptare dhe serbe, sipas deklaratave të autoriteteve.
p.c. / dita
