Besimtarët ortodoksë festojnë mesnatën e sotme Pashkën, një ditë e shënuar e kalendarit fetar.
Korça ka filluar që dje festimet e pashkëve ortodokse, me traditë në këtë qytet. Kështu, pasditen e djeshme, ditës së të ”Premtes së Zezë”, bulevardi Shën Gjergji, i zbukuruar edhe për Pashkë, është mbushur plot me njerëz, që nuk janë vetëm korçarë, por edhe turistë e pelegrinë nga i gjithë vendi, për procesionin e Epitafit të Jezu Krishtit.
Priftërinjtë ortodoksë janë vendosur në krye të besimtarëve, në një ceremoni që ka zgjatur më shumë se një orë, e njohur si Procesioni i Epitafit.
View this post on Instagram
Korça këtë fundjavë është e mbipopulluar. Hoteleritë janë të prenotuara të gjitha që prej më shumë se një muaji. E po ashtu restorantet.
Sot në mbrëmje, në orën 12.00 në mesnatë do të ketë një tjetër dyndje të madhe në këtë boulevard për të pritur Ringjalljen e Krishtit dhe për t’ia lënë vendin më pas ceremonive familjare.
Edhe kryeministri i vendit Edi Rama ndau sot në rrjetet sociale foto nga ceremonia e Udhës së Kryqit në Korçë, e njohur ndryshe si lëvizja e Epitafit të Krishtit, që i paraprin Ngjalljes së Krishtit, ose Pashkës në datën 5 maj.
Për ortodoksët kjo është Java e Madhe e Shenjtë, ndërsa mesnata mes 4-5 majit kulmon me ceremonitë në kishë që kremtojnë ngjalljen e Krishtit.
Pashka është një nga kremtimet më të mëdha të ortodoksëve. Ata risjellin në vëmendje ngjarjen e madhe të ngjalljes së Jezusit të Nazaretit, tre ditë pas vdekjes së tij në kryq.
“Krishti u ngjall”, është urimi i kësaj dite festive i cili shprehet njëzëri nga të gjithë besimtarët duke trokitur vezën e kuqe të Pashkëve që simbolizon gjakun e Krishtit.
j.l./ dita
