Përpara se të niseshin me traget drejt Greqisë për pushime, qindra turistë u detyruan të largoheshin me të njëjtën rrugë për t’i shpëtuar flakëve që kanë përfshirë disa zona të vendit.
Zjarret e mëdha pyjore, të favorizuara nga temperaturat ekstreme dhe erërat e forta, kanë krijuar një situatë kritike, duke detyruar autoritetet të organizojnë evakuime masive.
Në zonën bregdetare të Agios Vasileios, në rajonin e Viotisë, qindra persona, kryesisht turistë, u evakuuan me tragete dhe mjete të tjera detare pasi flakët iu afruan me shpejtësi zonave të banuara. Sipas autoriteteve greke, mbi 200 persona janë nxjerrë në siguri, ndërsa rreth 100 të tjerë pritet të largohen përmes detit. Zjarri shpërtheu të premten në mëngjes, duke izoluar rreth 500 persona në zonë.
Një situatë e rëndë vijon edhe në ishullin e Kretës, ku një zjarr i fuqishëm ka përfshirë mijëra hektarë sipërfaqe dhe ka detyruar rreth 8 mijë banorë e turistë të largohen përkohësisht nga shtëpitë dhe akomodimet e tyre.
Vatra aktive zjarri janë regjistruar edhe në ishujt Paros, Andros dhe Kalymnos. Autoritetet kanë ngritur alarmin për shkak të motit të nxehtë dhe erërave të forta, të cilat po favorizojnë përhapjen e shpejtë të flakëve.
j.l./ dita
