Dhjetëra mijëra njerëz kanë dalë në rrugë në të gjithë Izraelin pasi kryeministri Benjamin Netanyahu shkarkoi ministrin e tij të mbrojtjes.
Yoav Gallant ishte shprehur kundër planeve që po diskutoheshin për të riparuar sistemin e drejtësisë. Në Jerusalem, policia dhe ushtarët përdorën topa uji kundër demonstruesve pranë shtëpisë së Netanyahut.
Të hënën herët në mëngjes, presidenti i Izraelit Isaac Herzog i bëri thirrje qeverisë që të ndalojë reformat.
“Për hir të unitetit të popullit të Izraelit, për hir të përgjegjësisë, ju bëj thirrje që të ndaloni menjëherë procesin legjislativ,” tha ai në Twitter , duke shtuar se sytë e të gjithë popullit të Izraelit janë mbi ju.
SHBA tha gjithashtu se ishte thellësisht e shqetësuar për zhvillimet dhe bëri thirrje për një kompromis. Reformat përfshijnë plane që do t’i jepnin qeverisë kontroll vendimtar mbi komitetin që emëron gjyqtarët. Ato gjithashtu do ta bënin më të vështirë për gjykatat të largonin një lider që konsiderohet i papërshtatshëm për detyrë, gjë që ka zemëruar shumë njerëz që e konsiderojnë atë në interes të kryeministrit aktual, Benjamin Netanyahu, i cili përballet me një gjyq të vazhdueshëm për korrupsion.
Netanyahu thotë se reformat janë krijuar për të ndaluar gjykatat të tejkalojnë kompetencat e tyre dhe se ato u votuan nga publiku në zgjedhjet e fundit. Pasi protestuan jashtë shtëpisë së Netanyahut, demonstruesit, shumë duke valëvitur flamuj izraelitë dhe duke përplasur tenxhere dhe tigan, iu shmangën forcave të policisë për të mbërritur në parlamentin e Izraelit, Knesset. Një punonjëse e qeverisë tha për BBC se Netanyahu kapërceu çdo vijë që ata kanë si një vend demokratik.
“Ne po mbrojmë edhe pjesën e fundit të demokracisë që kemi dhe nuk mund të fle në këtë mënyrë. Nuk mund të bëj asgjë derisa të ndalojmë këtë çmenduri”, tha ajo.
Pas shkarkimit, ish-ministri Gallant shkroi: Shteti i sigurisë së Izraelit ka qenë gjithmonë dhe do të jetë gjithmonë misioni im i jetës.
Një reagim pati edhe nga lideri i opozitës, Yair Lapid.
“Netanyahu mund të shkarkojë Gallantin, por ai nuk mund të shkarkojë realitetin ose të shkarkojë popullin e Izraelit që po përballet për t’i rezistuar çmendurisë së koalicionit”, tha Lapid.
Gallant foli kundër reformës në drejtësi të shtunën, ku tha se anëtarët e Forcave të Mbrojtjes izraelite ishin të zemëruar dhe të zhgënjyer. Netanyahu, i cili ishte jashtë vendit në kohën e paraqitjes së Gallant në TV, tha se nuk kishte më besim tek ai si ministër i mbrojtjes. Kështu të dielën Netenyahu firmosi shkarkimin e tij.
j.l./ dita