Një stuhi e fortë me reshje të dendura shiu ka shkaktuar dëme të mëdha në Zaragoza të Spanjës, pasditen e sotme.
Mediat e huaja bëjnë me dije se stuhia e madhe filloi pak para orës 12:00 dhe zgjati vetëm 15-20 minuta, por kaq ishte e mjaftueshme për të paralizuar pothuajse gjithë shërbimet në vend.
Si pasojë e këtij moti doli jashtë funksioni tramvaji dhe sistemi kryesor i transportit. Trafiku hekurudhor, me shpejtësi të lartë dhe konvencional, u bllokua midis Zaragozës dhe Barcelonës dhe fluturimet nga Palma u devijuan.
Stuhia e paparashikuar shkaktoi dëme të mëdha edhe në çatitë e banesave si dhe bimët e mbjella.
