Teilor Tivari është autori i dyshuar i ngjarjes së ndodhur mbrëmjen e djeshme në qytetin e Durrësit, ku mbeti i vrarë 51-vjeçari Valbon Beqiraj.
24-vjeçari rezulton të jetë në mesin e disa personave që janë shoqëruar për ngjarjen e ndodhur në lagjen 12 të qytetit bregdetar.
Viktima duket se kishte ftuar disa miq në banesë, me njërin prej të cilëve mendohet të jetë konfliktuar. Hetuesit kanë marrë gjurmën e gishtërinjve dhe kanë analizuar edhe kamerat e sigurisë për të shkuar drejt autorit.
Autori i dyshuar, 21-vjeçari Teilor Tivari, ka rrëfyer para policisë se e qëlloi me thikë Beqirin pasi, sipas tij, ky i fundit kishte tentuar ta përdhunonte.
“Ishim miq, më ftoi për një birrë në shtëpinë e tij dhe shkova. Tentoi të më përdhunonte, provova të mbrohesha, por ishte i fuqishëm prandaj mora thikën e bukës dhe e godita. U largova i tronditur nga vendi i ngjarjes, nuk mendoja se do të vdiste” – ka deklaruar 21-vjeçari para uniformave blu.
51-vjeçari u gjet pa shenja jete në banesë, por nga ekspertiza paraprake mjekoligjore e kryer nga grupi hetimor, nën drejtimin e Prokurorisë, ka rezultuar se në trupin e Beqirajt kishte shenja dhune dhe plagë të shkaktuara me mjet prerës, si pasojë e të cilave dyshohet se ky shtetas ka humbur jetën.
“Përgjatë natës dhe aktualisht, grupi i posaçëm hetimor ka kryer dhe është duke kryer një sërë veprimesh të thelluara hetimore, me qëllim zbardhjen dhe dokumentimin e ngjarjes, identifikimin dhe kapjen e autorit/ve”, lexohet në njoftimin e Policisë.
j.l./ dita
