Presidenti i Serbisë Aleksandër Vuçiç ka dërguar sot një mesazh për kritikët e tij nga tarraca e Presidencës, duke ngrenë qershi e duke pirë “Coca-Cola”.
I shoqëruar nga kryeministrja Ana Brnabiç dhe ministri i Financave Sinisha Mali, Vuçiç iu ka hedhur “dorashkën” atyre që duan ta largojnë nga pushteti, duke iu kërkuar se cilat janë kushtet e tyre, pasi pretendon që deri më tani nuk ka dijeni lidhur me asgjë konkrete.
“Kanë kaluar saktësisht 10 ditë që kur ftova ata që protestojnë në rrugë dhe që bëjnë kërkesa të caktuara, të vijnë të bisedojnë. Nuk kanë telefonuar, nuk janë të interesuar të flasin”, tha presidenti në postimin e bërë në rrjetet sociale.
Ai shton se i vjen keq për këtë dhe se mendon se është një gabim i madh.
“Në shoqëritë demokratike gjërat zgjidhen me biseda. Gjërat nuk zgjidhen duke më quajtur mua, Anën, Sinishën, këdo, të çmendur, vrasës, kriminelë. E gjithë kjo, duke e ditur se sa po mashtroni publikun.
Gjërat zgjidhen me bisedime dhe kompromise. Nuk kemi kohë për të humbur kur është fjala për Serbinë tonë. I ftoj të gjithë të tjerët të punojnë si kurrë më parë, edhe më fort. Ftoj Serbinë të bashkohet, të mërkurën qytetarët e Serbisë do të kenë shumë lajme të rëndësishme, politike dhe të tjera. Rroftë Serbia”, shtoi ai.
Në Beograd, kryeqytetin e Serbisë, po zhvillohen protesta “Serbia kundër dhunës”.
Këto protesta filluan si pasojë e dy masakrave të ndodhura në një shkollë në Beograd dhe një fshat pranë kryeqytetit, ku u vranë 18 persona.
Protestat janë më të mëdhatë në rrugët e kryeqytet serb që nga tetori i vitit 2000, kur u përmbys qeveria e kasapit të Ballkanit, Sllobodan Millosheviç.
Shumë protestues gjatë të shtunës brohoritën për dorëheqjen e Vuçiç. Thirrjeve të qytetarëve u është bashkuar edhe opozita që kërkon zgjedhje të parakohshme dhe qeveri tranzitore.
View this post on Instagram
j.l./ dita
