Udhëheqësit e Bashkimit Evropian dhe presidenti ukrainas, Volodymyr Zelensky, lëshuan sot (21 tetor) një deklaratë të përbashkët, duke mbështetur iniciativën e Presidentit të SHBA-së Donald Trump, për një ndërprerje të menjëhershme të armiqësive në Ukrainë dhe fillimin e negociatave të paqes në bazë të vijës ekzistuese të kontaktit.
Të dyja palët – BE dhe Zelensky – theksuan se ndryshimi i kufijve të njohur ndërkombëtarisht “është i papranueshëm” dhe bënë thirrje për rritjen e presionit mbi ekonominë ruse.
Deklarata u lëshua nga Presidenti i Ukrainës, si dhe presidentët e Francës dhe Finlandës, kryeministrat e Britanisë, Italisë, Polonisë dhe Norvegjisë, Kancelari i Gjermanisë, Presidenti i Komisionit Evropian dhe Presidenti i Këshillit Evropian.
“Ne mbështesim fuqimisht qëndrimin e Presidentit Trump se armiqësitë duhet të ndërpriten menjëherë dhe se vija ekzistuese e kontaktit duhet të jetë pika fillestare për negociatat. Ne mbetemi të përkushtuar ndaj parimit se kufijtë ndërkombëtarë nuk mund të ndryshohen me forcë”, thuhet në deklaratë.
Deklarata thekson se vonesa e Rusisë në proces tregon se Ukraina është e vetmja palë që dëshiron vërtet paqe, prandaj duhet të jetë në pozicionin më të fortë të mundshëm para, gjatë dhe pas çdo armëpushimi.
“Ne duhet të rrisim presionin mbi ekonominë ruse dhe industrinë e saj të mbrojtjes derisa Putini të jetë gati të bëjë paqe. Aktualisht po zhvillojmë masa që synojnë përdorimin e vlerës së plotë të aseteve sovrane ruse të ngrira në mënyrë që Ukraina të ketë burimet e nevojshme”, thuhet gjithashtu në deklaratë.
Dokumenti gjithashtu thotë se këtë javë udhëheqësit do të takohen brenda Këshillit Evropian dhe brenda Aleancës së të Gatshmëve për të diskutuar se si të ecin përpara me këtë punë dhe të vazhdojnë të mbështesin Ukrainën.
Kujtojmë se presidenti amerikan deklaroi, pas takimit me presidentin ukrainas, se Zelensky dhe Putin duhet të ndalojnë luftën brenda kufijve aktualë territorialë dhe të arrijnë një marrëveshje. Kremlini u përgjigj duke hedhur poshtë idenë e “ngrirjes” së vijës së frontit.
j.l./ dita
