Presidenti ukrainas Volodymyr Zelenskyy ka theksuar se marrëveshja për mineralet e nënshkruar me SHBA-në ishte rezultat i negociatave që çuan në një marrëveshje vërtet të barabartë. Në fjalimin e tij ai vuri në dukje se marrëveshja nuk parashikon detyrime shlyerjeje për ndihmën e mëparshme të SHBA-së për Kievin.
Bëhet e ditur se pas disa muajsh diskutimesh intensive, SHBA dhe Ukraina finalizuan një marrëveshje që pritet t’i japë Uashingtonit akses në mineralet kritike të Ukrainës dhe burimet e tjera natyrore, një marrëveshje që Kievi shpreson se do të sigurojë mbështetje të qëndrueshme për mbrojtjen e tij kundër Rusisë.
Zyrtarët ukrainas kanë deklaruar se marrëveshja e nënshkruar është dukshëm më e favorshme për Ukrainën në krahasim me marrëveshjet e mëparshme, për të cilat ata pretenduan se e vendosën Kievin në një rol vartës dhe i dhanë Uashingtonit kontroll të jashtëzakonshëm mbi burimet e vendit.
Kjo marrëveshje, në pritje të ratifikimit nga parlamenti ukrainas, do të krijojë një fond rindërtimi për Ukrainën, i cili zyrtarët besojnë se do të lehtësojë mbështetjen e vazhdueshme ushtarake amerikane.
Një version i mëparshëm i kësaj marrëveshje ishte afër përfundimit, por përfundimisht u ndërpre gjatë një takimi të diskutueshëm në Zyrën Ovale që përfshinte presidentin e SHBA-së Donald Trump, zëvendëspresidentin JD Vance dhe Zelenskyn. Gjithashtu edhe banorët e Kievit reaguan ndaj marrëveshjes SHBA-Ukrainë.
“Çdo lajm është i vështirë për t’u marrë, qoftë për negociata apo diçka tjetër. Unë ende besoj dhe shpresoj se çdo veprim do të japë një rezultat që do ta çojë Ukrainën tonë drejt fitores. Vetëm drejt fitores”, tha Diana Abramova, banore e Kievit.
Raportohet se Ukraina e sheh këtë marrëveshje si një mjet për të garantuar që aleati i saj më i rëndësishëm dhe me ndikim të mbetet i përfshirë dhe të mos tërheqë ndihmën ushtarake, e cila ka qenë vendimtare në luftën e saj të vazhdueshme kundër agresionit rus.
