Komisioni Qendror i Zgjedhjeve ka njoftuar se janë regjistruar rreth 35 mijë votues jashtë Kosovës, që nga 1 shtatori deri më 13 dhjetor. Ndëkohë, rreth 2,150 kërkesa për aplikim janë refuzuar.
Zëdhënësi i KQZ-së, Valmir Elezi, bën më dije se numri më i madh i shtetasve janë regjistruar për të votuar përmes postës.
KQZ ka sqaruar se lidhur me aplikimet e refuzuara, nuk është një refuzim përfundimtar, pasi kanë të drejtë të ri-aplikojnë. Sipas njoftimit, në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit.
Më pak se dy javë kanë mbetur deri në përfundim të afatit për aplikim për regjistrimin e votuesve jashtë Kosovës.
“Në bazë të të dhënave, deri më 13 dhjetor, në orën 21:30, pas aplikimit përmes platformës elektronike (http://diaspora.kqz-ks.org) janë aprovuar 34,757 kërkesa për regjistrim, ndërsa 2,150 janë refuzuar. Nga 34,757 aplikime të aprovuara, 8,942 shtetas të Kosovës janë regjistruar për të votuar fizikisht në përfaqësi diplomatike 5,489 janë regjistruar për të dërguar pakon me fletëvotim në kutinë postare të KQZ-në në Kosovë dhe 20,326 janë regjistruar për të dërguar pakon me fletëvotim në kutinë postare jashtë Kosovës.
Nëse një shtetasi i refuzohet aplikimi, ky nuk është një refuzim përfundimtar, pasi i njëjti ka të drejtë të ri-aplikojë. KQZ i informon individualisht aplikuesit e refuzuar për arsye të refuzimit të kërkesës së tyre dhe gjithashtu aplikuesit e refuzuar njoftohen se mund të ri-aplikojnë për regjistrim dhe të bashkëngjisin dokumentet e nevojshme për të përmbushur kërkesën e tyre në përputhje me udhëzimet e KQZ-së”, u shpreh Elezi.
i.b./dita
