Zgjedhjet e parakohshme që u mbajtën të dielën në veri të Kosovës, ishin të qeta dhe pa incidente. Është kjo deklarata që ka bërë kryeministri i Kosovës, Albin Kurti.
Sipas tij, frika dhe shantazhi i Beogradit ndaj qytetarëve, ishte shkak i pjesëmarrjes së ulët në zgjedhjet që u mbajtën në katër komunat veriore dhe në 2 kuvendet komunale.
“Zgjedhjet për kryetar në katër komunat veriore të Kosovës dhe për kuvendet komunale në dy sosh, dje u zhvilluan qetë dhe pa incidente. Falënderoj KQZ-në për organizimin, policinë e Kosovës për sigurinë dhe qytetarët për mbështetjen.
Atmosfera ishte ajo e frikësimit dhe shantazhit andaj edhe dalja e qytetarëve në zgjedhje ishte e ulët. Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri. I falënderoj qytetarët për kurajon dhe qetësinë”, shkruan Kurti në rrjetin social Facebook teksa ka uruar kryetarët dhe asamblistët e zgjedhur.
Kryeministri u ka dhënë atyre një mesazh, që të punojnë me përkushtim dhe të shërbejnë pa dallim për mirëqenien e qytetarëve dhe të drejtat e tyre.
“Uroj kryetarët dhe asamblistët e zgjedhur dje. Ata duhet të punojnë me përkushtim dhe të shërbejnë pa dallim. Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë. Për mirëqenien e qytetarëve dhe të drejtat e tyre”, përfundon Kurti.
Komisioni Qendror i Zgjedhjeve bëri të ditur ditën e djeshme (23 prill) përfundimin e procesit zgjedhor në 4 komunat në veri të Kosovës, për zgjedhjet e jashtëzakonshme për kryetar në katër komunat Mitrovicë e Veriut, Zveçan, Leposaviq dhe Zubin Potok, si dhe për zgjedhjet e parakohshme për dy kuvendet komunale Zveçan dhe Leposaviq.
p.k\dita
