Lista Serbe ka reaguar për herë të parë pas trazirave që kanë përfshirë veriun e Kosovës.
Partia kryesore e serbëve i ka shprehur ngushëllime familjeve të serbëve të vrarë dhe policit Afrim Bunjaku, të cilët humbën jetën gjatë sulmit të armatosur në Banjskë të Zveçanit më 24 shtator.
Lista Serbe kërkon hetimin e serbëve të vrarë dhe ngre dilemën se pse EULEX-i nuk mori pjesë në operacion, por vetëm policia e Albin Kurtit.
“Kërkojmë hetim për vrasjen e së paku dy serbëve, që u vranë me gjakftohtësi edhe pse u dorëzuan. Pyesim bashkësinë ndërkombëtare pse EULEX-i nuk mori pjesë në operacion, por vetëm policia e [kryeministri i Kosovës, Albin] Kurtit?”, tha Lista Serbe.
Më tej, në deklaratë partia serbe i bëri thirrje urgjente KFOR-i dhe EULEX-i të vendosen në veri për të parandaluar përshkallëzimin e mëtejmë të situatës.
“Në këtë drejtim kemi nevojë urgjente që KFOR-i dhe EULEX-i të vendosen në veri për të parandaluar përshkallëzimin e mëtejmë të situatës dhe për të parandaluar abuzimet politike të kësaj ngjarje tragjike”, tha Lista Serbe.
o.j/dita
