Ndryshon rrjedha e dëshmive të dhëna më herët nga sanitarja e ish-zyrtares Alda Klosi, Rozeta Dobi, e cila u akuzua se ka vjedhur shumën prej 10 mijë euro në shtëpinë e Klosit.
Vetë Dobi ka pranuar të bashkëpunojë me prokurorinë dhe të tregojë me detaje për shumat e mëdha të parave që ajo pretendon se nuk i vodhi, por ia dha vetë Klosi pas konflikteve që ajo kishte me ish-bashkëshortin.
Dobi u ndje e tradhëtuar nga ish-zyrtarja dhe për këtë ndryshoi dëshminë e saj. Sipas dëshmisë së sanitares Rozeta Dobi, Klosi dispononte disa pasuri, ndërsa për vjedhjen e parave kërkonte të fajësonte ish-bashkëshortin. Referuar dosjes hetimore, ajo ka deklaruar se përveç parave, Klosi i ka premtuar edhe një tharëse rrobash që do ia blinte sapo të këthehej nga Amerika.
Rozeta Dobi që aktualisht po mbahet e arrestuar me akuzën e vjedhjes së kryer në bashkëpunim, ka treguar për hetuesit se Klosi e paguante 20 euro në ditë për të pastruar banesat, ndërsa vjedhjen e parave në apartamentin që ndodhet në rruëgn e Kosovarëve dhjetorin e kaluar e kanë inskenuar.
“Pasi mora paratë, kam vajtur në banesën e Aldes, kam sistemuar rrobat që i kisha bërë rremujë të enjten, kam pastruar shtëpinë, dhe në fund ka ardhur Alda e cila më ka bërë pagesën e muajit 100 euro, më pas më ka dhënë edhe shumën e shpërblimit 10.000 euro. Për tharësen më ka thënë se do të shikoj se si do më eci puna dhe kur të kthehem nga Amerika do ta blejë.
Deklarimet që une kam dhënë në momentet e para të pyetjes si deklarues dhe person nën hetim, nuk janë të vërteta. Ato i kam dhënë në atë formë pasi nuk e besoja që situata do të arrinte deri këtu ku jemi sot.
Pasi kisha besim tek Alda, që nuk do të arrinte deri këtu, pasi ne e kishim lënë që të fajësonte bashkëshortin, pasi ajo e donte patjetër në burg.”
Dobi ka treguar edhe për disa pasuri të paluajtshme të tjera që Klosi disponon, përfshi një apartament dhe një garazh në Tiranë një vilë tek Kodra e Diellit si dhe një shtëpi private në bregdetin e Vunoit.
Alda Klosi u arrestua një muaj më parë pas dëshmisë së Dobit për akuzat e pastrimt të parave, mosdeklarim të pasurisë dhe deklarim të rremë para oficerit të policisë gjyqësore.
m.b./dita
