I penduari i drejtësisë dhe një nga figurat më të rëndësishme në hetimet e SPAK, Nuredin Dumani, është paraqitur me urgjencë në spitalin e burgut pas problemeve të rënda shëndetësore.
Burime të brendshme konfirmojnë se ai ka shfaqur komplikacione pas konsumimit të ushqimit, çka ka ngritur menjëherë alarmin për një mundësi helmimi të qëllimshëm.
Dumani, ish-killeri i kthyer në bashkëpunëtor të drejtësisë, është një nga dëshmitarët kyç në disa nga dosjet më të mëdha të krimit të organizuar në Shqipëri.
Ai ka rrëfyer emra, skema dhe lidhje mes botës së errët të krimit dhe strukturave të korruptuara të shtetit. Prania e tij në sallat e gjyqeve është kthyer në kërcënim të drejtpërdrejtë për shumë individë me ndikim.
Dyshimet për helmim, ende të pakonfirmuara zyrtarisht, kanë rikthyer në vëmendje pikërisht këtë fakt: shumëkush do të donte të mos fliste më.
Burime spitalore thanë se gjendja e tij është stabilizuar dhe se do të kryhen analiza më të thelluara për të kuptuar natyrën e problemit.
Autoritetet e sigurisë kanë shtuar masat mbrojtëse rreth Dumanit, ndërsa SPAK ende nuk ka bërë një koment zyrtar për ngjarjen.
Mediat raportojnë edhe probleme të tij me zemrën.Problemet e para me zemrën, Nuredin Dumani, i ka konstatuar në vitin 2009, kur u paraqit në spital për një vizitë për kurimin e këmbës.
Në atë kohë, u desh një aksident automobilistik në rrugën Çermë-Divjakë, që Nuredin Dumani, të shtrohej në spital për shkak të thyerjes së këmbës në 3 pjesë të ndryshme.
Teksa mjekët e spitalit, filluan me analizat dhe ekzaminimet mjekësore, ata kuptuan se pacienti, Nuredin Dumani, që deri në atë kohë nuk i kishte hyrë rrugës së vrasjeve por punonte si tregtar i fruta-perimeve, vuante nga anomali serioze të zemrës.
Ai i është nënshtruar 2 operacioneve kirurgjikale në spitalin “Nënë Tereza” në Tiranë dhe në vitin 2018 në spitalin Bordo të Francës, ku ka kryer transplantin e aortës.
o.p. / dita
