Kryeministri i Malit të Zi, Dritan Abazoviç është përballur me një situatë të vështirë, e cila mund të kishte përfunduar keq.
Gjatë kohës që ka qenë duke lëvizur me makinë nuk kanë funksionuar frenat.
Autoritetet në Mal të Zi kanë nisur një hetim për të zbuluar shkakun r asaj që ka ndodhut me mjetin shtetëror me të cilën lëvizte lideri malazez, i cili në atë kohë ishte në një vizitë zyrtare në Tivar.
Ministria e Punëve të Brendshme, sipas medias Vijesti, njoftoi se ngjarja ka ndodhur më 31 korrik.
Pas konstatimit të problemit, makina është arritur të ndalohet në anë të rrugës, e më pas Abazoviç ka përdorur një mjet tjetër nga eskorta që e shoqëronte.
Nga MPB thonë se kontrollet e deritanishme tregojnë se bëhet fjalë për avari për shkak të vjetërsisë dhe kilometrazhit që ka mjeti.
“Ne jemi të bindur nga kontrolli i deritanishëm se defekti i automjetit ka ardhur për shkak të vjetërsisë dhe kilometrazhit të konsiderueshëm”, bëri me dije Ministria e Brendshme.
Ata sqarojnë se 12 vjet është mosha mesatare e mjeteve motorike.
“Po ashtu edhe për momentin nuk ka të dhëna që do të tregonin se dështimi i mjetit të lartpërmendur në ngjarjen në fjalë është shkaktuar nga faktori njerëzor. Duke pasur parasysh se bëhet fjalë për një automjet që përdoret nga zyrtarë të Administratës Policore, të cilët kryejnë detyra sigurie për Kryetarin e Qeverisë së Malit të Zi, Ministri i Punëve të Brendshme, Filip Axhiç, ka iniciuar mbikëqyrjen e jashtëzakonshme nga Drejtoria për Çështje të Sigurisë dhe Mbikëqyrjes me qëllim përcaktimin e shkakut të ngjarjes”, tha Axhiç.
j.l./ dita
