Ministrja e Arsimit dhe Sportit, Ogerta Manastirliu ishte pasditen e së hënës në SPAK lidhur me dosjen e sterilizimit.
Gazetari Eni Ferhati, i cili mundi t’i shkëpuste edhe një deklaratë pas daljes nga Prokuroria e Posaçme tha se ajo u thirr për PPP-në e sterilizimit.
Manastirliu është ministrja e parë në detyrë që shkel në dyert e SPAK dhe arsyeja e pranisë së saj në Prokurorinë e Posaçme lidhet me dosjen për të cilën tashmë ka patur edhe arrestime.
Gazetari tregoi se në bazë të dosjes së SPAK për sterilizimin, Manastirliu në kohën që ka qenë drejtoreshë e QSUT i ka bërë një kërkesë Ilir Beqajt, në atë kohë ministër i Shëndetësisë për disa fonde që të vihej në punë një pajisje ekzistuese për sterilizimin, që nuk është marrë në konsideratë nga ky i fundit.
“Manastirliu ju përgjigj pyetjes lidhur me arsyet e pranisë së saj në SPAK që siç tha lidhej me pozicionin e saj kur ishte drejtuese e QSUT. Në bazë të dosjes së SPAK rezulton se sa i përket çështjes së sterilizimit, në zyrën e Beqajt ishte një kërkesë e Manastirliut që kërkonte fonde për të vënë në punë një pajisje që ndodhej në QSUT për t’i dhënë zgjidhje sterilizimit dhe në dosjen e SPAK thuhet se kjo kërkesë nuk u mor parasysh”, tha gazetari.
n.s. / dita
