Pas takimit me kryetarët e rinj të komunave të veriut në zyrën e BE-së në Prishtinë, ambasadori i SHBA-së në Kosovë, Jeffrey Hovenier është takuar edhe me presidenten e Kosovës, Vjosa Osmani.
Në përfundim të takimit me Osmanin, ambasadori amerikan u shpreh i shqetësuar për situatën në veri, ndërsa tha se për SHBA është e rëndësishme që zyrtarët të mos hyjnë me forcë në institucione.
“Kisha takim me presidenten Vjosa Osmani me kërkesë të saj. I keni parë reagimet tona. Janë shumë të qarta. Jemi shumë të shqetësuar për situatën në veri kryetarët duhet të kryejnë detyrat e tyre, por jo të hyjnë më forcë në objektet e komunës”, tha Hovenier.
Ambasadori Hovenier foli edhe për takimin me kryetarët e komunave në veri.
“Edhe me ta diskutuam për shqetësimet lidhur me situatën. Ky mbetet ende qëndrimi ynë. Edhe me kryetarët e diskutuam se si mund ta kryejnë detyrën e tyre dhe t’u shërbejnë qytetarëve, sidomos pa pasur nevojë për forcë që të hyjnë në institucione”, tha Hovenier.
Në takim me ambasadorin ishte kryetari i Komunës së Zveçanit, Ilir Peci dhe ai i Zubin Potokut, Izmir Zeqiri, ndërsa kryetari i Leposaviqit, Lulzim Hetemi dhe ai i Mitrovicës së Veriut, Erden Atiç nuk janë parë të shkojnë ën takim, raportojnë mediat e Kosovës.
Ky takim u zhvillua në kuadër të qetësimit të situatës në veri në Kosovës, që u tensionua pas hyrjes së kryetarëve të rinj të komunave Zveçan, Leposaviç dhe Zubin Potok në institucionet përkatëse.
