Presidenti turk, Rexhep Tajip Erdogan, do të takohet këtë të martë me homologun e tij ukrainas, Volodymyr Zelenskyy, në kryeqytetin turk, Ankara. Lajmin e konfirmoi drejtori turk i komunikimit, Fahrettin Altun, përmes një deklarate në platformën X.
“Sipas ftesës së presidentit tonë, z. Recep Tayyip Erdogan, presidenti ukrainas Volodymyr Zelenskyy do të zhvillojë një vizitë zyrtare në vendin tonë të martën, më 18 shkurt, ku do të pritet në Kompleksin Presidencial,” deklaroi Altun.
Mediat turke raportojnë se Zelenskyy ka mbërritur tashmë në Turqi, ku do të zhvillojë bisedime me Erdoganin mbi partneritetin strategjik mes dy vendeve. Diskutimet pritet të përfshijnë një rishikim të marrëdhënieve dypalëshe dhe hapa konkretë për forcimin e bashkëpunimit turko-ukrainas. Po ashtu, liderët do të shkëmbejnë pikëpamje mbi zhvillimet më të fundit në Ukrainë dhe çështje të tjera rajonale e globale.
Vizita e papritur e presidentit ukrainas vjen në një moment kyç, pasi në Riad të Arabisë Saudite po zhvillohen bisedime mes delegacionit rus, të udhëhequr nga ministri i Jashtëm Sergei Lavrov, dhe përfaqësuesve amerikanë, të kryesuar nga Sekretari i Shtetit, Marco Rubio. Në qendër të këtyre negociatave është arritja e një marrëveshjeje për paqe në Ukrainë. Rusia ka kërkuar që Europa të mos jetë pjesë e bisedimeve, ndërsa ish-presidenti amerikan, Donald Trump, ka dhënë garanci për përfshirjen e Ukrainës në procesin e negociatave.
Në këtë kontekst të tensionuar diplomatik, vizita e Zelenskyt në Ankara mund të luajë një rol kyç në koordinimin e pozicioneve mes Turqisë dhe Ukrainës për negociatat e paqes.
j.l./ dita
