Rusia zyrtare ka reaguar ashpër ndaj sulmit terrorist të një grupi të armatosur serbësh në veri të Kosovës, duke akuzuar kryeministrin Albin Kurti.
Zëdhënësja e Ministrisë së Jashtme të Rusisë, Maria Zakharova, përmes një deklarate është shprehur se Kurti tenton të ndezë konfliktin për të “spastruar territorin nga serbët”.
Ajo ka thënë se këto ngjarje mund ta çojnë Ballkanin “në një greminë të rrezikshme”.
Duket se retorika e ashpër e Kremlinit është në sinkron të plotë me Beogradin për t’u viktimizuar, ndonëse sulmi i djeshëm terrorist i dështuar ndaj Kosovës i nxorri zbuluar planet e tyre për të minuar jo vetëm veriun e Kosovës por të gjithë sigurinë në rajon.
“Gjakderdhja e djeshme është rezultat i drejtpërdrejtë i kursit të marrë nga i ashtuquajturi kryeministër Albin Kurti për të ndezur konfliktin dhe për të spastruar territorin nga serbët”, tha diplomatja ruse Zahkarova.
Përpjekjet e kreut të qeverisë së Kosovës për të “provokuar vendet perëndimore që të rrisin presionin ndaj Serbisë për të detyruar Beogradin të njohë ‘pavarësinë’ e Kosovës, janë një lojë e rrezikshme që ka një kosto të lartë dhe e afron rrezikshëm të gjithë rajonin e Ballkanit në një greminë të rrezikshme”, deklaroi Zakharova.
“Kërcënimi i drejtpërdrejtë i një ringjalljeje të spastrimit etnik, i praktikuar më parë nga radikalët shqiptarë kosovarë, bëhet i dukshëm”, tha ajo.
Ngjarjen e komentoi edhe zëdhënësi i Vladimir Putinit, Dmitry Peskov, duke e konsideruar situatën aktuale si “potencialisht të rrezikshme”, megjithëse ai shtoi se Moska nuk posedonte informacion të mjaftueshëm për të komentuar ngjarjet.
j.l./ dita
