Ish-presidenti amerikan, Joe Biden është diagnostikuar me një formë “agresive” të kancerit të prostatës. Lajmin e njoftoi të dielën zyra e ish-presidentit amerikan, duke shtuar se demokrati 82-vjeçar ka metastaza në kocka.
Presidenti republikan i SHBA-së, Donald Trump në një reagim në rrjete sociale shkroi se ishte i trishtuar pasi u përhap lajmi se paraardhësi i tij në detyrë vuante nga një formë agresive e kancerit të prostatës. Ai i uroi shërim të shpejtë.
“Unë dhe Melania jemi të trishtuar të dëgjojmë për diagnozën e fundit mjekësore të Joe Biden. I shprehim urimet tona më të ngrohta dhe më të mirat (gruas së ish-presidentit) Jill dhe i urojmë Joe-t shërim të shpejtë dhe të suksesshëm”, shkroi kreu i shtetit amerikan.
Biden, i cili la detyrën në janar, u diagnostikua të premten pasi vizitoi një mjek javën e kaluar për simptoma urinare. Kanceri i prostatës është kanceri i dytë më i zakonshëm që prek burrat, pas kancerit të lëkurës, sipas Klinikës së Clevelandit. Qendrat për Kontrollin dhe Parandalimin e Sëmundjeve (CDC) në SHBA raportojnë se 13 nga 100 burra do të zhvillojnë kancer të prostatës në një moment të jetës së tyre. Mosha është faktori më i zakonshëm i rrezikut.
Kanceri që ka metastazuar është më i vështirë për t’u trajtuar sesa kanceri që mbetet në një vend, sepse është përhapur në të gjithë trupin, duke e bërë më të vështirë për ilaçet të arrijnë dhe të shkatërrojnë të gjitha tumoret.
Por ka njëfarë shprese nga ekipi mjekësor i Bidenit. Ata thonë se kanceri i tij duket se është i ndjeshëm ndaj hormoneve. Kur kanceri i prostatës përshkruhet si “i ndjeshëm ndaj hormoneve”, kjo do të thotë se rritja dhe përhapja e tij nxiten nga hormonet mashkullore të quajtura androgjene, të cilat janë kryesisht testosteroni dhe dihidrotestosteroni.
Qelizat e prostatës kanë receptorë androgjenikë, me të cilët androgjenët lidhen dhe stimulojnë rritjen dhe përhapjen e qelizave. Megjithatë, tek pacientët me kancer të prostatës, androgjenet nxisin rritjen e qelizave kancerogjene.
Kanceret e prostatës të ndjeshme ndaj hormoneve varen nga këto androgjene për t’u rritur dhe mbijetuar, gjë që i bën ato një objektiv të terapisë hormonale, e quajtur edhe terapi e privimit të androgjenit.
Trajtimi synon të ulë nivelet e androgjenëve ose të bllokojë veprimin e tyre, duke parandaluar në mënyrë efektive rritjen e qelizave kancerogjene. Megjithatë, shumë kancere të prostatës përfundimisht zhvillojnë rezistencë ndaj trajtimit dhe vazhdojnë të rriten pavarësisht niveleve të ulëta të androgjenit. Në këtë rast, trajtimet e linjës së dytë, të tilla si kimioterapia, terapitë e synuara dhe radiofarmaceutikët, mund të ndihmojnë në luftimin e kancerit.
Donald J. Trump Truth Social 05.18.25 05:32 PM EST
Melania and I are saddened to hear about Joe Biden’s recent medical diagnosis. We extend our warmest and best wishes to Jill and the family, and we wish Joe a fast and successful recovery.
— Commentary Donald J. Trump Posts From Truth Social (@TrumpDailyPosts) May 18, 2025
j.l./ dita
