Një ngjarje e pazakontë ka ndodhur mbrëmjen e sotme në stadiumin “Niko Dovana” të Durrësit, gjatë sfidës mes Teutës dhe Tiranës e vlefshme për javën e dytë të kampionatit “Abissnet Superiore”.
Mësohet se, sistemi i ndriçimit ka pësuar shkëputje të njëpasnjëshme të energjisë elektrike, duke e zhytur fushën dhe tribunat në errësirë e duke detyruar arbitrin të ndërpresë takimin për dy herë me radhë.
Pavarësisht ndërprerjes së lojës, tifozët e pranishëm në shkallët e stadiumit krijuan një atmosferë të veçantë duke ndezur dritat e blicave të telefonave për të ndriçuar ambientin. Sapo stadiumi mbeti në terr, nga tribunat nisën të dëgjoheshin në kor thirrjet e tifozëve, “Rama ik!”
Pas ndërprerjes së parë ndeshja nisi sërish, por pas pak minutash pësoi sërish një tjetër shkëputje të ndriçimit. Shkaqet e këtij defekti teknik në rrjetin elektrik të stadiumit mbeten ende të paqarta, ndërsa incidenti shfaq sërish problemet me infrastrukturën në elitën e futbollit shqiptar.
j.l./ dita
