Kreu i fuqishëm i një bande ekuadoriane, Adolfo Macías Villamar, i njohur si “Fito”, është ekstraduar në Shtetet e Bashkuara për tu përballur me akuza që lidhen me trafikimin e drogës dhe armëve. Fito u rikap në qershor, gati një vit pasi u arratis nga një burg i sigurisë së lartë ku ai kishte vuajtur një dënim me 34 vjet burg për disa krime.
Ekstradimi i tij shënon një hap të rëndësishëm në përpjekjet ndërkombëtare për të luftuar krimin e organizuar dhe trafikimin ndërkufitar. Ai do të paraqitet në një gjykatë federale amerikane të hënën, ku do të deklarohet i pafajshëm për akuzat ndërkombëtare për trafik droge dhe armësh, tha avokati i tij për Reuters.
Macías ishte kreu i bandës Los Choneros, e cila është e lidhur me organizata të fuqishme kriminale nga Meksika dhe Ballkani. Ai dyshohet gjithashtu se ka urdhëruar vrasjen e kandidatit presidencial Fernando Villavicencio në vitin 2023. Los Choneros fajësohet për transformimin e Ekuadorit nga një parajsë turistike në një vend me një nga nivelet më të larta të vrasjeve në rajon.
Më shumë se 70% e të gjithë kokainës së prodhuar në botë kalon aktualisht nëpër portet e Ekuadorit. Vendi ndodhet midis dy eksportuesve kryesorë të kokainës në botë, Kolumbisë dhe Perusë. Në qershor, policia e gjurmoi Macías deri në atë që e përshkruan si një bunker nëntokësor poshtë një shtëpie luksoze në qytetin e Mantës.
Ai u dërgua në La Roca, një burg i sigurisë maksimale. Në atë kohë, Presidenti i Ekuadorit, Daniel Noboa, vlerësoi forcat e sigurisë për kapjen e tij dhe tha se ai do të ekstradohej në SHBA. Autoriteti i burgjeve të vendit tha se ai u nxor nga burgu në Ekuador më herët të dielën për t’u dorëzuar autoriteteve amerikane.
“Unë dhe zoti Macías do të paraqitemi nesër para gjykatës federale të Bruklinit… ku ai do të deklarohet i pafajshëm. Më pas, ai do të mbahet në një burg që do të përcaktohet për një kohë të pacaktuar”, tha avokati i tij, Alexei Schacht, për Reuters.
j.l./ dita
