Në detin e Gjirin të Lalëzit pushuesit kanë filmuar këtë javë një dukuri të rrallë. Janë parë forma të çuditshme “godinash që lundronin” mbi sipërfaqen e derit.
Nuk janë as fantazma dhe as objekte të paidentifikuara. Pushuesit dhe banorët e zonës kanë kapur një nga dukuritë më magjepsëse dhe të rralla të natyrës, e njohur në të gjithë botën si Fata Morgana.
Por çfarë është në të vërtetë ky “truk” që natyra këtë herë e luajti pikërisht në bregdetin tonë?
Njihet si Fata Morgana dhe është një lloj mirazhi shumë i veçantë optik. Emri i saj vjen nga mitologjia e vjetër europiane, ku besohej se një zanë magjistare krijonte kështjella fluturuese mbi det për të hutuar detarët.
Në realitet, nuk ka asgjë magjike, por thjesht një lojë mjaft interesante të dritës me ajrin.
Si ndodh ky “truk” i dritës?
Zakonisht, sa më lart të ngjitesh, aq më i ftohtë bëhet ajri. Por në ditët me diell të nxehtë dhe det të qetë, ndodh e kundërta: Uji i detit mban të ftohtë shtresën e ajrit që ndodhet ngjitur me sipërfaqen e tij. Mbi këtë shtresë të ftohtë, ndodhet një shtresë tjetër ajri shumë më e nxehtë. Kur drita kalon përmes këtyre shtresave me temperatura të ndryshme, ajo nuk ecën më drejt, por përkulet (përthyhet).
Syri ynë është i programuar të besojë se drita vjen gjithmonë në vijë të drejtë. Prandaj, kur ka një ishull apo qoftë dhe një anije në horizont, mendja jonë e projekton atë më lart se sa është në të vërtetë, duke e bërë të duket sikur po “fluturon” ose “lundron”. Por duke qenë se “fata morgana” nuk rri kurrë e palëvizshme, me lëvizjen më të vogël të erës objekti në sytë tanë merr forma të ndryshme, më shpesh duket si një kështjellë me kulla. Pamja mund të përmbyset mbrapsht brenda pak minutave.
Kjo dukuri është mjaft e njohur në rajonet polare apo në ngushtica të famshme si ajo e Mesinës në Itali. Kushtet atmosferike këtë herë kanë qëlluar të duhura në bregdetin shqiptar.
Është fizika që po dhuron një nga spektaklet më vizuale të natyrës.
o.p. / dita
