Shumë udhëtarë pyesin se cili është vendi më i sigurt në avion në rast aksidenti. Statistikat shumëvjeçare kanë analizuar mbijetesën në përplasje të ndryshme, duke treguar qartë ndikimin e pozicionit të ulëses. Një studim i revistës *TIME*, që analizoi 35 vjet të dhëna për rrëzime avionësh, zbuloi se vendet më të sigurta janë ato të mesit në pjesën e pasme të avionit, me një normë vdekshmërie prej vetëm 28%.
Në krahasim, vendet në mes të avionit, afër korridorit, kishin një shkallë vdekshmërie shumë më të lartë – deri në 44%. Një faktor tjetër kyç është afërsia me daljet e emergjencës. Kjo u konfirmua edhe në tragjedinë e fundit me avionin **Air India**, ku i vetmi i mbijetuar ndodhej pikërisht pranë një daljeje emergjence në një Boeing 787. Ky rast shërben si shembull konkret për atë që studimet kishin paralajmëruar prej kohësh: se pozicioni në avion mund të bëjë dallimin mes jetës dhe vdekjes në një aksident të rëndë.
Sipas analizave, pjesa e pasme e avionit ka një shkallë vdekshmërie prej 32%, pjesa e mesme 39%, ndërsa pjesa e përparme 38%. Gjithashtu, pasagjerët brenda pesë rreshtave nga një dalje emergjence kanë më shumë gjasa të evakuohen me sukses.
Megjithëse aksidentet ajrore mbeten jashtëzakonisht të rralla, ekspertët nënvizojnë rëndësinë e njohjes me daljet emergjente dhe ndjekjes së udhëzimeve të ekuipazhit. Si përfundim, për të rritur shanset e mbijetesës, rekomandohet ulja në mes të rreshtit në pjesën e pasme të avionit, sa më pranë daljeve të emergjencës. Ngjarja e fundit me Air India është një kujtesë e hidhur për këtë realitet.
j.l./ dita
