Çmimi Nobel në Ekonomi për vitin 2022 iu jepet Ben Bernanke, Douglas Diamond dhe Philip Dybvig.
Ekspertët amerikanë u vlerësuan sot me çmimin Nobel në ekonomi për “kërkime mbi bankat dhe krizat financiare”.
Grupi u njoh nga Akademia Mbretërore Suedeze e Shkencave për punën e tyre në fillim të viteve 1980, për të cilën instituti tha se siguroi bazën për të kuptuarit modern se përse nevojiten bankat, dobësitë e tyre kryesore dhe se si kolapsi i tyre mund të nxisë shkrirjet financiare.
Komiteti i Nobel tha se puna e tyre kishte treguar në hulumtimin e tyre “se përse shmangia e kolapsit të bankave është jetike”.
Ish-kryetari i Rezervës Federale, Ben Bernanke, i cili drejtoi bankën qendrore të SHBA gjatë krizës financiare të vitit 2008, mori çmimin për kërkimin e tij mbi Depresionin e Madh. Puna e tij tregoi se rrjedhjet bankare ishin një arsye vendimtare që kriza u bë kaq e rëndë dhe e rrënjosur.
