Interi ka zyrtarizuar Juan Cuadradon si futbollistin më të ri të skuadrës së Simone Inzaghit. Kolumbiani i dha fund aventurës 8-vjeçare me Juventusin. Doli lojtar i lirë dhe i befasoi të gjithë duke zgjedhur nënkampionët e Europës.
35-vjeçari ka firmosur për një vit me Interin, teksa u shfaq shumë i gëzuar për këtë aventurë të re në karrierën e tij të gjatë.
“Jam shumë i lumtur: Falënderoj Zotin për këtë mundësi. Është nder për mua të jem këtu, në një nga ekipet më të mëdha në Europë. Jam i lumtur”, u shpreh Cuadrado.
Anësori i djathtë fitoi 5 tituj kampionë, 3 Kupa Italie dhe 2 Superkupa Italia gjatë viteve me bardhezinjtë e Juventusit.
Cuadrado shënoi 24 gola, katër nga të cilët kundër Interit, ndërkohë që dhuroi edhe 65 asiste me “zonjën e vjetër”.
