Detaje të reja janë zbardhur nga operacioni antidrogë “Risia” në Tiranë, ku policia sekuestroi mbi 12 kilogramë kanabis në formë xhelatine, me vlerë rreth 30 mijë euro. Sipas burimeve, droga me përqindje të lartë THC dyshohet se kishte mbërritur me postë nga Mbretëria e Bashkuar dhe kishte si destinacion Elbasanin. Gjatë operacionit, njëri prej të dyshuarve, Flavio Islamaj, arriti t’i shpëtonte policisë duke braktisur makinën pranë Digës së Liqenit Artificial, ndërsa Mariglen Vata u arrestua teksa dyshohet se po e shoqëronte me një automjet tjetër.
Antidroga e Tiranës organizoi operacionin pasi siguroi informacione për transportimin e lëndës narkotike. Flavio Islamaj, sapo kuptoi se po ndiqej nga efektivët në afërsi të rrethrrotullimit të Saukut, shtoi shpejtësinë për t’u larguar. Ai arriti deri pranë Digës së Liqenit Artificial, ku braktisi automjetin dhe u arratis me vrap.
Gjatë ndërhyrjes, policia konstatoi edhe një makinë tjetër, drejtuesi i së cilës po vëzhgonte lëvizjet e efektivëve. Në këtë automjet ndodhej Mariglen Vata, i cili u arrestua. Sipas dyshimeve, ai po shoqëronte Islamajn gjatë transportimit të drogës.
Lënda narkotike ishte vendosur në dy valixhe dhe ishte ndarë në rreth 500 pako të vogla. Policia gjeti gjithashtu disa paketime më të mëdha, që përmbanin nga 400 deri në 500 gramë kanabis secila.
Nga verifikimet rezulton se të dy të dyshuarit kanë precedentë të mëparshëm për çështje që lidhen me narkotikët. Islamaj dhe Vata janë miq me njëri-tjetrin dhe, sipas burimeve, kanë qëndruar së bashku në Angli, ku dyshohet se janë përfshirë në trafik droge. Hetuesit dyshojnë se ata e kanë vijuar këtë veprimtari edhe pas kthimit në Shqipëri.
Flavio Islamaj i kishte shpëtuar një tjetër operacioni policor në vitin 2025. Në atë kohë, efektivët kishin planifikuar arrestimin e tij gjatë tërheqjes së një pakoje me drogë të porositur përmes postës. Megjithatë, ai dyshohet se kuptoi se policia po e priste dhe arriti të largohej.
Pas kësaj ngjarjeje, Islamaj u shpall në kërkim, por mbetet e paqartë se si është zgjidhur më pas çështja e tij me drejtësinë.
Ndërkohë, Mariglen Vata rezulton të jetë arrestuar edhe në vitin 2022 për një çështje të lidhur me drogën.
j.l./ dita
