Berberhanet janë një nga tregtitë me rritje më të shpejtë në Britani dhe zyrtarët kanë frikë se ato po përdoren gjithnjë e më shumë si baza për krimin e organizuar.
Burimet i kanë thënë “Daily Mail” se bandat po përdorin disa biznese për të fshehur të ardhurat e krimit dhe se shumë prej tyre mund të jenë një bazë për trafikun e qenieve njerëzore dhe punën e skllevërve në të njëjtën mënyrë që janë përdorur në të kaluarën lavazhet.
Shpërthimi i berberhaneve në Londër dhe qytete të tjera të mëdha në Britani ka bërë që ekspertët të bëjnë thirrje për një hetim.
Disa po drejtohen nga bandat shqiptare dhe kurde të dyshuara se fitojnë para duke kontrabanduar dhjetëra mijëra emigrantë që futen me kamionë dhe varka të vogla përtej Kanalit.
Ish-oficeri i Policisë Metropolitane, Ali Hassan Ali tha se ka një numër në rritje të berberhaneve që nga pandemia.
“Shumë nga këto dyqane kanë mijëra paund pajisje, por nuk kanë klientë. Nga përvoja ime, ka arsye të forta për të besuar se një numër i madh, veçanërisht ato në pronësi të shqiptarëve, turqve dhe kurdëve, kanë lidhje me krimin e organizuar. Kjo mund të jetë kontrabandë me njerëz dhe në disa raste drogë”.
“Ne e dimë se bandat e kontrabandës së njerëzve janë drejtuar tradicionalisht nga kurdët, por ata tani po punojnë me shqiptarët”.
“Rritja e papritur e dyqaneve të berberëve është vërtet shqetësuese sepse ato po luajnë një rol në financimin e trafikimit të qenieve njerëzore”.
Të dhënat e fundit tregojnë se midis 2014 dhe 2019 ka pasur një rritje prej 64 për qind të numrit të dyqaneve të berberëve në Mbretërinë e Bashkuar, nga 7,958 në 13,046.
j.l./ dita