Policia e Shtetit ka publikuar pamjet e shoqërimit të 34-vjeçarit Elvis Koçi alias Çaushllari, i njohur si “Vis Korçari”, ndërsa ka dhënë edhe detaje mbi operacionin për kapjen e tij në Ksamil.
Sipas njoftimit zyrtar, operacioni i koduar “Fast” u finalizua nga Komisariati i Policisë Sarandë, në bashkëpunim me Drejtorinë e Forcës së Posaçme Operacionale në Policinë e Shtetit, pas një pune intensive hetimore dhe operative për lokalizimin e personave në kërkim.
Policia bën me dije se 34-vjeçari është lokalizuar në qendër të Ksamilit, në një automjet tip “Audi”, ku më pas është ndërhyrë për kapjen e tij.
Gjatë ndërhyrjes, ai dyshohet se ka tentuar të largohet, por është neutralizuar dhe arrestuar nga forcat e policisë.
Sipas raportimeve mediatike, gjatë operacionit policor ai tentoi t’i shmangej arrestimit dhe gjatë largimit përplasi automjete të policisë.
Elvis Çaushllari është një emër i njohur për drejtësinë, i përfolur për përfshirje në përplasjet e grupeve kriminale në Elbasan.
Ai u arrestua në vitin 2022 nga SPAK në kuadër të operacionit “Plumbi i Artë”, ndërsa u lirua rreth një vit më vonë.
Në hetimet e mëparshme është folur edhe për armiqësitë e tij me grupin e Suel Çelës në Elbasan, madje i ka shpëtuar edhe një atentati në vitin 2020.
Njoftimi i policisë:
Sipas autoriteteve, shtetasi E. K. (Ç.), 34 vjeç, banues në Elbasan, rezulton person me rrezikshmëri të lartë shoqërore dhe i dyshuar si pjesë e një grupi kriminal në qytetin e Elbasanit.
Policia sqaron se ai ishte shpallur në kërkim, pasi Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin e Gjykatës së Posaçme të Shkallës së Parë, e cila e ka dënuar me 4 vite burg për veprat penale “Grup i strukturuar kriminal” dhe “Sigurimi i kushteve dhe mjeteve materiale për të kryer vrasje”.
Sipas të dhënave zyrtare, atij i kanë mbetur për të vuajtur 2 vjet, 9 muaj dhe 9 ditë burgim.
Materialet procedurale i janë referuar Prokurorisë për veprime të mëtejshme.
j.l./ dita
