Southampton po përgatitet të rifillojë punën për sezonin e ri, por këtë herë jo në elitë, në Premier League, por në Championship, pasi është klubi i parë që u rrëzua. Megjithatë në sezonin e ardhshëm skuadra nuk do të drejtohet nga trajneri Ruben Selles. Këtë lajm e ka bërë publik vetë klubi, ndërsa thekson se palët kanë rënë dakord që të ndërpresin marrëveshjen në fund të këtij edicioni të Premier League. Spanjolli pranoi të drejtonte skuadrën në javët e fundit, pavarësisht se situata dukej shumë e komplikuar megjithatë ai nuk do të qëndrojë në krye të saj sezonin e ardhshëm.
Edhe Andrea Pirlo nuk është më trajneri i skuadrës së Fatih Karagumruk. Në një njoftim përmes kanaleve zyratre klubi turk ka bërë publike “ndarjen” nga Pirlo. Tre ditë para përfundimit të kampionatit, përfundon aventura e italianit në Superligën e Turqisë. Karagumruk aktualisht është i nënti në renditje dhe ka humbur në dy ndeshjet e fundit, kundër Adana Demirspor dhe Trabzonspor. “Ne kemi vendosur që të mos vazhdojmë më bashkëpunimin me zotin Pirlo sezonin e ardhshëm dhe i dhamë leje që të largohej nga klubi menjëherë për të na lejuar të planifikojmë të ardhmen. Jemi të kënaqur me kohën e kaluar së bashku, e falënderojmë dhe i urojmë më të mirat. per te ardhmen.”-thuhet në komunikatën e Fatih Karagumruk.
Pavarësisht vendit të dytë në renditje dhe triumfit në Kupën e Holandës, aventura e Ruud van Nistelrooy në stolin e PSV-së mori fund pas vetëm një sezoni. Është vetë klubi i Eindhoven-it që e bën të ditur vendimin e marrë nga trajneri holandez, “me keqardhje të madhe”. Para se ky vendim të bëhej publik në mediet holandeze u raportua për probleme mes klubit dhe teknikut, megjithatë ende nuk dihen arsyet e vërteta që çuan në “divorcin” mes PSV-së dhe Ruud van Nistelrooy.
