Tërheqja e dëftesave dhe e certifikatave të Maturës Shtetërorë për herë të parë do të mund të bëhet online, pa qenë e nevojshme që të paraqiteni fizikisht në shkollë.
Ministria e Arsimit dhe Sportit ka konfirmuar dhënien e këtij shërbimi online, ku mjafton të logoheni në portalin e-Albania dhe dëftesat do të mund të printohen në kohë reale.
“Jemi krenarë që këtë vit arritëm ta përmbushim me sukses angazhimin tonë që, si: certifikatat e notave të maturës, ashtu dhe dëftesat e nxënësve për çdo vit shkollor në sistemin parauniversitar, do të printohen nga platforma e-Albania sa herë që dëshironi, pa qenë nevoja të drejtoheni fizikisht në institucionet arsimore.
Përveç kësaj, të gjithë ata të cilëve u duhen këto dokumente për jashtë vendit, janë lehtësuar edhe nga procedura e mëparshme për vulë legalizimi në QSHA, por drejtohen vetëm në Ministrinë për Evropën dhe Punët e Jashtme për vulën apostile.
Kjo arritje u bë e mundur si rezultat i bashkëpunimit me AKSHI-n dhe QSHA-në për ndërtimin dhe vënien në funksion të plotë të sistemit SMIP, si dhe falë përkushtimit e këmbënguljes maksimale të të gjithë mësuesve dhe zyrave arsimore për ta realizuar këtë shërbim në kohën e duhur”, konfirmon ministrja e Arsimit dhe Sportit, Evis Kushi.
