Në emisionin “N’xhiro me Syçin”, gazetari dhe analisti Ilir Demaliaj nuk kurseu kritikat e forta ndaj realitetit politik dhe shoqëror shqiptar, duke vënë në shënjestër figurat publike që sipas tij jetojnë me frikën e së shkuarës dhe një elitë të korruptuar që ka prodhuar vetëm hipokrizi.
“Pas viteve ’90 ne nuk bëmë katarsis,” deklaroi Demaliaj, duke theksuar se në vend të ballafaqimit me të kaluarën, shoqëria shqiptare prodhoi një fasadë falsiteti, ku ish-bashkëpunëtorë të regjimit u rishfaqën si antikomunistë dhe morën kontrollin e politikës dhe medias.
Ai theksoi se frika për të zbuluar të shkuarën vijon të jetë pengesë për lirinë e vërtetë: “Njeriu është i lirë vetëm kur heq frikën. Këta kanë frikë mos u dalin dosjet, bashkëpunimet me regjimin. Kemi një shoqëri që vazhdon të jetojë në falsitet.”
Demaliaj u ndal dhe te personazhet aktualë politikë, duke ironizuar deklaratat e forta të disa deputetëve: “Ky Alizoti që thotë ‘do t’ju hamë gjallë’… ku është sot? Me atë rezultat katastrofë, duhej të kishte dorëzuar mandatin.”
Kritika të forta pati edhe për figurat që deklarohen “sovranistë” apo “antikomunistë”, ndërkohë që u shërbejnë ish-komunistëve: “Si mund të jetë sovranist dikush që ka hapur telashe me çështje si Beleri dhe deti, ndërkohë që lavdërohet me biografi e jo me integritet personal?”
