Albert Einstein është ndoshta shkencëtari më i madh që bota ka njohur ndonjëherë. Laureati i Nobelit dhe ideatori i teorisë së relativitetit, ai vdiq më 18 prill 1955 në moshën 76-vjeçare pasi fillimisht hodhi themelet e fizikës moderne dhe pasi ndryshoi mënyrën se si ne e shohim hapësirën, kohën, energjinë. Por sa e dinë se ai ishte i varur nga vezët e skuqura?
Sipas librit zbulues “Ajnshtajni në shtëpi” shkruar për të nga historiani i shkencës Friedrich Herneck në bashkëpunim me Herta Waldow, një shtëpiake që jetoi me Ajnshtajnin, gruan dhe vajzën e tij nga viti 1927 deri në 1933 në rezidencën në Berlin të shkencëtarit të madh, kishte shumë aspekte të çuditshme në karakterin e tij.
Ky libër i veçantë ofron pamje magjepsëse në rutinën e përditshme të shkencëtarit të madh. Ai flet për gruan e tij, dashurinë për muzikën klasike dhe lundrimin, rrethin e gjerë të miqve dhe dashnoret e tij.
Përmenden gjithashtu shumë takime me të famshëm: nga ylli i filmit Charlie Chaplin dhe dirigjenti Erich Kleiber te autorët Thomas dhe Heinrich Mann dhe kolegët shkencëtarë Max Planck, Max Born dhe Erwin Schrödinger.
Me një hyrje të detajuar që paraqet këto intervista, ata krijojnë një pamje të gjallë të Albert Ajnshtajnit, jo shkencëtarit, por njeriut.
Sipas shërbëtores së tij, Albert Ajnshtajni ishte gjithmonë i ngushtë me paratë dhe përpiqej të kursente kudo. Është tregues, sipas dëshmisë së shërbëtores së tij, se ai mbante këpucë me vrima edhe nëse ato ishin aq të veshura saqë uji i hynte në këmbë. “Ai do t’i vishte ato deri në atë pikë sa nuk do të shkonin më tej”, tha Waldow. Ajo tha se këpucët e tij të preferuara ishin sandalet.
Zakonet e çuditshme të një gjeniu
Ai ishte i fiksuar pas vezëve. Pothuajse çdo ditë ai hante dy vezë për mëngjes zakonisht të skuqura së bashku dhe kërpudha. Ai i donte kërpudhat, mund të hante kërpudha tri herë në ditë. Ajo që ai nuk mund të hante ishte biftek i papjekur. “Unë nuk jam tigër”, thoshte dhe kërkonte që mishi i tij të ishte gatuar shumë mirë.
Ai gjithashtu e urrente kuzhinën angleze. “Është e tmerrshme, gatuajnë gjithçka me yndyrë deleje, luleshtrydhet me krem pana ishin më e mira e saj”.
Ai rrallë pinte alkool dhe pinte vetëm kafe, ndërsa i pëlqente të pinte selino!
Atij i pëlqente të luante violinë gjatë natës, por loja e tij ishte e tmerrshme. Në fakt, ai nuk luante pjesë të njohura, por kompozime të veta.
Një nga miqtë e tij thoshte se e lëvizte harkun si marangoz.
Atë e shqetësonin festat dhe tubimet shoqërore. Megjithatë, ka pasur raste kur ai merrte pjesë në darka me personazhe të famshëm të kohës si Charlie Chaplin.
Sipas publikimit që zbulon një pjesë të përmbajtjes së librit, Ajnshtajni shpesh ecte lakuriq nëpër shtëpi. Një herë, sipas raportimit të shërbëtores së tij, ai u shfaq i zhveshur në një ditë kur një vajzë 21-vjeçare kishte ardhur për të punuar tek ai.
Ajnshtajni ishte atëherë 48 vjeç.
j.l./ dita
