Dhjetëra qytetarë janë mbledhur pasditen e kësaj të diele para ambienteve të Ministrisë së Brendshme.
Protesta e tyre vjen pas ngjarjes së ditës së djeshme në Zvërnec, ku protestuesit u dhunuan nga një roje private.
Protestuesit bënë thirrje për mbështetje dhe reagim të fuqishëm qytetar, ndërsa kërkojnë zgjedhjen e kësaj situate nga ana e insitucioneve përgjegjëse. Aktivisti, Taulant Binaj u shpreh gjatë protestës se Shqipëria nuk shitet.
Sipas tij, qeveria me ligjet e miratuara prej saj duan që zonat e mbrojtura përfshirë Rrjollin, Kune Vini, Patokun, Karavastanë, Vjosë Nartën, Butrintin t’i shesin. Pas marshimit të tyre para ambienteve të Ministrisë së Brendshme, protestuesit u drejtuan për te Kryeministria.
“Anuloni projektin”, “Shqipëria e shqiptarëve”, “Shqipëria nuk shitet”, “Duam dorëheqje”, këto kanë qenë disa nga thirrjet e qytetarëve.
Banorët në Zvërnec protestuan ditën e djeshme, kundër ndërtimeve të cilat parashikohen të ndërtohen në atë zonë, ndërsa deklaruan se tubimi i tyre vjen për shkak se po u vidhet prona e tyre.
